對沖基金越嚟越受投資者歡迎，令基金經理收入水漲船高。全球最頂尖嘅25個對沖基金經理舊年一共賺咗140億美金（約1092億港紙），相等於冰島全年嘅國內生產總值。數學教授出身嘅RenaissanceTechnologies主席西蒙斯（JamesSimons）舊年就袋咗17億美金（約133億港紙）榮登榜首，但能夠年賺過10億美金嘅只得三人，有股壇狙擊手之稱嘅索羅斯原來三甲不入。
《Alpha》雜誌剛啱就對沖基金經理薪酬表現做咗個調查，西蒙斯已經連續第二年坐上冠軍嘅寶座，舊年收入比前年多13%，平均每月賺11億港紙；假設佢一年365日都返工，一日都賺3643萬港銀，認真巴閉。華爾街收入稱冠嘅高盛行政總裁布蘭克費恩都望塵莫及，皆因佢舊年嘅薪酬、紅利同股票加埋都係得5340萬美金。
68歲嘅西蒙斯82年開始擔任Renaissance主席，管理資產超過200億美金，旗下僱員230人。至於被稱為國際金融大鱷嘅索羅斯舊年就唔多爭氣，由前年嘅探花滑落至第4位，但都賺咗9.5億美金（約74億港紙）。
全球收入最高嘅25個對沖基金經理平均薪酬5.7億美金，比前年多咗57%。基金經理賺到豬籠入水，但對沖基金平均回報就只得13%，仲跑輸標普500指數同MSCI環球指數，班畀錢對沖基金投資嘅有錢佬唔知又有乜反應呢？
[email protected]