曾拍攝《貂蟬》、《不了情》同《江山美人》等電影嘅已故亞洲影后林黛，其夫龍繩勳今個月2號喺夢中病逝，享年84歲。據知，龍繩勳係因為十二指腸大量出血致死，佢爸爸係國民黨雲南省主席龍雲，由於龍繩勳係龍雲嘅五公子，所以好多人都叫佢做「龍五」。
父母未必合葬
龍繩勳嘅喪禮噚日舉行，採用天主教儀式。噚日馮仁昭打電話去慰問林黛同龍繩勳嘅獨生子龍宗瀚，睇吓佢心情平復未，龍宗瀚好有禮貌咁話：「唔好意思，我唔係公眾人物，自己比較低調，有關自己嘅嘢我唔想多講。」至於噚日佢爸爸嘅喪禮，龍宗瀚就話：「其實冇乜可以講，唔係大規模，爸爸嘅家姐有嚟到，另外，一啲外國親友都有嚟到……我契家姐馮寶寶都喺度，我好感激佢幫我打點，自己喺呢方面冇乜經驗。」馮仁昭問佢爸爸會唔會同媽媽葬埋一齊時，龍宗瀚話媽媽係葬喺天主教墳場，而佢爸爸好細個喺內地受洗，難證明教徒身份，所以可能性應該唔大。據知，龍繩勳喺香港同泰國都有唔少物業，保守估計龍宗瀚會繼承佢爸爸幾千萬嘅遺產。
