意甲聯周二傳出兩單炒教練消息，分別係巴勒莫嘅古杜連同墨西拿嘅基奧丹奴，呢兩位人兄喺球季臨結束先收大信封，意外之餘亦證明意球會老闆個腦都有啲問題！
基奧丹奴1季被炒兩次
點解？因為巴勒莫雖然喺2月中以來11場聯賽不勝，但係唔可以怪晒教練古杜連，好似季初弗到漏嘅阿馬利長唞就係主因；何況佢哋曾先後打和AC米蘭、國際米蘭同費倫天拿，表現一啲都唔差，贏唔到只係欠多少運氣啫！而且，巴勒莫早喺4月初1:3輸畀卡利亞里後，會長森柏連尼已公開話要炒古杜連，點知突然又轉軚話自己一時講錯啫，你話球員點專心打波呀？𠵱家聯賽淨番5輪、落後第4位AC米蘭7分，先由助教高保接手，又有咩用呢？
至於排倒數第2位嘅墨西拿仲衰，今季1月底已經炒過基奧丹奴由卡華辛接手，結果見後者冇料到，4月2日叫番基奧丹奴回巢，𠵱家又炒佢由保基執教至季尾。咁搞法有乜理由唔降班呢？