足球員生涯短暫，季初俾人撞親個頭，幾乎提早收山嘅車路士龍門施治，喺呢方面自然感受至深。經一事長一智，呢位哥仔近期起勢進修，嚟緊目標係修讀心理學，為未來事業鋪路，果然有遠見。
修讀課程離不開足球
施治今年只係24歲，以打龍門呢個位嚟講應該仲有排踢，但佢喺舊年10月被雷丁球員史堤芬亨特撞裂頭骨後，一度短暫失憶，試過睇10分鐘電視都頭暈；雖然佢接受手術之後好番，可繼續佢嘅足球事業，但話冇陰影就勢係假。
唔講唔知，原來佢之前已經修讀關於英文、法律同埋社會學等等嘅課程，成績唔錯，仲考到讀大學嘅資格，家陣準備專攻心理學。佢話：「呢個科目明顯同足球有關。」又係嘅，球員受傷喺場邊坐，等於心靈創傷，佢讀完呢科，大吉利是講句，將來就算隊友受傷，佢都可以利用專業知識，幫人分析或者開解一吓。如果讀得掂，將來掛靴後又多條路，點講都係好事。嗰啲只顧及時行樂，有時間只識賭錢或媾女嘅球員，應該學吓施治啦。