大球場在星期六舉行「齊誦道德經」大會，超過一萬人齊誦「道可道，非常道！名可名，非常名。無名天地之始，有名萬物之母。故常無欲，以觀其妙，常有欲，以觀其徼。此兩者同出而異名，同謂之玄，玄之又玄，眾妙之門。」
玄之又玄，唔知有幾多人可以完全明白《道德經》之精義呢？冇計啦，明不明，明可明，非常明，讀得多，讀到熟，識背誦，明唔明白就等日後造化，一萬年不久，毋須只爭朝夕。
女士Y幾逢凡有大事，必有佢份。左丁山在馬會嘆茶之際，忽收電話短訊，於是行出門外打電話畀佢：「請問有冇急事。」女士Y在那邊大叫苦也，原來當時大球場只有兩千人，開場時間未到，但女廁已經塞到水長流，女士唔敢行入去，女士Y憤而訴苦。佢話問過啲清潔阿嬸，阿嬸冷然而對：「對唔住啦，大球場女廁係咁嘅嘞，人多啲就會塞晒，我哋冇晒符，此乃結構性問題，請你向啲大人物投訴。」
邊啲大人物？康文署？大球場？工務局？食環署？冇人知，去邊個部門投訴都會指到你頭擰擰。呢個大球場乃正宗大白象，舊大球場仲好得多，當年拆卸重建，搵馬會笨，要馬會捐錢幾億，我哋啲馬迷其實奉獻咗唔少。起好之後就話產生噪音，不能舉辦音樂會，本地球賽冇人睇，極少去大球場踢，於是用七位數字買咗廣告包廂使用權嘅大公司大呼搵笨，然後大球場啲草地啲草皮甚差，成為笑話，總之呢個大球場除咗外觀幾好睇之外，內裏百病叢生，馬會捐錢久有歷史，相信以捐建大球場呢一單最老襯。
不如咁嘞，趁住啓德舊地夠晒大，應該將大球場拆卸，改建豪宅，以賣地所得，喺啓德興建番一個奧林匹克運動場，請北京奧運建築師策劃，完成後一定靚得多，實用得多，唔會女廁常塞咁羞家。況且在啓德興建新場館，一併解決噪音問題，可以開幾萬人嘅音樂會，分分鐘有經營盈利㖭。