香港有幾多人叫做TonyChan？姓陳嘅人非常多，三十幾歲以上嘅男士以Tony為名者亦不少，姓陳而叫做Tony，相信起碼有幾萬人啩？
神秘人身份曝光，有相片為證。一位老師TonyChan上課嘅時候，畀學生開玩笑：「陳Sir，你係TonyChan噃，有成千億身家，仲使乜教書呀？」呢位陳Sir只能苦笑：「可惜我只識藝術，唔識風水呢，入錯行，讀錯書咯。」藝術與玄學，同樣難讀，不過主修後者，原來回報高到不得了。
千億遺產如何分配，尚未可知，但爭產官司就幾乎一定有，信託Ｃ喺銀行做信託（trust），對遺囑十分熟悉，佢認為小甜甜○六年十月嗰份英文遺囑如果加上兩行，例如：「這是我最後的遺囑，我謹此撤消以前訂立的任何遺囑，並決定以下列方法分配我的遺產：」，就會清楚好多，上到法庭冇得拗，𠵱家就唔敢講咯。投資Ｌ以前係律師，佢話：「寫遺囑有好多樣本啫，小甜甜兩份遺囑，一中一英，唔掂喎。正規遺囑上幾乎每一字眼都有法律含義，經過幾百年嘅審訊考驗，凡律師都識㗎。」
人哋嘅遺囑，關我哋乜事吖，投資Ｌ話決定有生之年，使晒啲錢，不留下任何遺產。信託Ｃ話遺囑有唔少款式，一位富豪有先見之明，喺遺囑內加入一個條款，聲言任何遺產受益人如有不服分配方法，發動爭產官司嘅話，就斗零都冇得分。當然，若任何一位受益人不服，係可以打官司嘅，但佢要計吓條數，如果官司贏咗，佢可以有好多着數，但如果萬一輸咗，就會乜都冇晒，何況打官司又需要一大筆律師費……結果人人都服，家庭安靜。
一位仁兄在結婚前寫下遺囑，分配好晒家產。殊不知，咁樣阻止唔到太太嘅，因為婚前遺囑在結婚後就失效，如果唔想太太分晒身家，唔該訂下一份結婚協議書！投資Ｌ話：「生前就為死後傷盡腦筋，要咁多錢做乜吖。」唉，唔傷腦筋都唔得啦，廠家Ｂ成六十歲，大仔已經讀完碩士，點知廠家Ｃ一時失手，喺東莞嘅「愛人」為佢生多一名，只有六個月大，唔寫好遺囑？第日一定家庭吵鬧。