汽車生產商開發嘅汽車安全技術，例如甚麼雙安全氣袋、有卸力設計嘅車架等，九成都係為車主而設，無他嘅，講到底畀錢嗰個先係米飯班主！不過諗深一層，我悠穎馳就算身為車主，都總有做行人要過馬路嘅時候，假如生產商致力開發保障行人安全嘅系統，咁就連市民都得益喇。
日產汽車就諗通呢點，開發咗套保障行人系統，雖不算乜嘢新發明，只係將現有GPS系統進一步擴展。原理係假設行人身上帶住部GPS裝置，如GPS手機、PDA等，咁系統就會自動計算行人嘅移動方向同速度，萬一發覺同附近車輛有發生碰撞危險，系統就會通過汽車導航系統通知司機，令車主有所準備！日產宣稱會喺3年內將呢個系統實用化，我心諗，每日有咁多盲毛聽住iPod亂過馬路，呢班人如果肯帶住個GPS出街，分分鐘可以保佢哋一命喎！
不過，當我將呢件事同細妹悠娛思講完之後，佢即刻反問我：「咦？如果係咁，彌敦道咁多人，個個都帶住個GPS，你個導航咪會響爆囉？」咦？又係喎！
悠穎馳
豪邁不羈，愛車如命，聽幾下引擎聲就知咩車！