仲有3個月，真人版《變形金剛》香港才上畫，但宣傳攻勢已浪接浪。海報、網上流傳預告，甚至有關復刻玩具，搶盡玩具迷視線。近日電影公司在銅鑼灣JP隆重其事，播放最新2分鐘預告片，更展出即將發售的新一代柯柏文玩具。《蘋果》今回更獨家試玩，將老柯變完彗星再變貨櫃車頭，實行過足手癮。
記者︰陸俊雄
攝影︰陳盛臣
機械人出場時間過少
2分鐘預告繼續賣關子
史提芬史匹堡監製，米高比爾做導演，自從《變形金剛》電影海報曝光後，好多戲迷都對呢套特技巨製流晒口水。除網上流傳過兩條30秒預告外，電影公司至今保密功夫做足，外界從未見過機械人的完整變身過程。等到頸長之際，近日「洲立」和「孩之寶」就將一條為時2分鐘的最新電影預告，在銅鑼灣JP戲院率先播放。
雖然2分鐘內見過柯柏文、麥加登和大黃蜂，但剪輯太過零碎，每次都係變少少、睇到少少。簡單講，照舊唔想機械人曝光太多。至於最可以肯定的，之前盛傳上畫日期7月4日，其實係指美國，香港要等到在7月26日。亦據可靠消息透露，今集主角並唔係柯柏文和麥加登，反而係男主角施亞拉保夫駛出駛入的黃色跑車大黃蜂。麥加登出現機會唔多，因故事講「狂派」成員到地球四出尋找老大麥加登下落。唔使問，套戲一早計劃好會拍續集。
柯柏文變身 變足半粒鐘
會場展出好幾款仍未公開發售的《變形金剛》玩具，《蘋果》今次獨家搶先試玩，當中包括柯柏文和星星叫未到地球前的真身形態、柯柏文Leader版、老柯變聲頭盔及ARMBLASTER。特別係Leader版的複雜程度，對住說明書由機械人變做貨櫃車頭，都搞足半個鐘。
Leader版老柯
Leader版即是最新電影版的造型，老柯可由貨櫃車頭變身做機械人，變身後大約10吋高。頭可按下收起，再按頭會彈出，而且會發聲和胸前玻璃有燈閃亮。雖然第一次為老柯變身花了半小時，但不禁佩服設計師的厲害，惟美中不足係膝頭位未夠靈活。6月2日全球同步發售，售價待定。
最新電影版柯柏文變身
彗星真身形態
原來柯柏文真身唔係貨櫃車，電影就解畫，變形金剛在老家斯比頓星時有一個真身形態，每到一個新星球時，都會掃描當地物件來隱藏身份。今次真身出埋玩具，有點似《新世紀福音戰士》，仲可變做彗星形態，5月1日正式公開發售，售價待定。
星星叫獨家變身過程
柯柏文獨家變身過程
現場直擊新舊玩具晒冷
雖然大會播放的最新預告和兩條網上版預告，合共才3分鐘，但仍吸引大批傳媒前來，事關仲有新舊《變形金剛》玩具展出。新的《蘋果》全數試玩過，舊的係由忠實粉絲借出來，包括不同年份出版的老柯和近期熱炒至$800的MP-05手槍版麥加登等。
幪面金剛變身
「幪面金剛」未聽過呢？其實係指柯柏文變聲頭盔及ARMBLASTER。頭盔連大人都戴得到，但戴兩分鐘已覺有點焗；再配合由貨櫃車變成的ARMBLASTER，好有《幪面超人》玩具裝備的感覺。同樣6月2日發售，但售價待定。
紀念筆全港100支
這次《變形金剛》宣傳活動製作相當認真，派發給傳媒朋友的PressKit感覺像相簿，前後各有「博」、「狂」兩派標誌。打開更有支紀念筆，屬非賣品全港只有100支。據講支筆在日本訂戲票時，將會隨飛附送，但香港唔會有相同情況出現。此外，當日到場人士亦獲變形金剛計數機，同筆一樣，雖唔可以變做機械人，但一按下去的「變化」，好有高科技感。
