香港人愛打機，通街都可以見到機迷打機盛況，不過一向以來甚少有製作人訪港，見得最多都係《GT》之父山內一典，而前日微軟就請來有《FF》之父之稱嘅板口博信來港，宣傳中文版《藍龍》推出之餘，更可讓機迷一睹呢位宗師級遊戲製作人風采！
記者：許福合
攝影：伍慶泉
玩Photoshop生創意
板口博信15年前曾經到香港，今次再度來港，見到四周都係高樓大廈，第一句就話「好似玩模擬城巿一樣！」佢今次到港，主要係宣傳最新作《藍龍》推出中文版，所以經常都會被問到如何構思出《藍龍》？原來一開始時，板口博信用《Photoshop》拉扯鳥山明畫冊，從而構思出影子戰鬥系統，成為《藍龍》遊戲基礎。而整個《藍龍》製作過程長達2年9個月，加上製作團隊屬新組合，當中當然有遇到困難，板口博信直頭話「好似生咗個女。」不過亦不忘大讚微軟技術上作出唔少支援，遇到問題都好快就能解決。
唔知有冇廣東話
板口博信貴為遊戲界頂級製作人，要同佢做訪問雖然唔使過五關斬六將，不過限制都有唔少，例如發問題目就要預先經過挑選，好似筆者原先打算問佢對遊戲使用Blu-ray同HDDVD睇法同中文版未能與日版同步原因，都未能直接提問。因為《藍龍》會推出多個語言版本，當被問到會否有廣東話時，竟然答唔太清楚，要問現場微軟人員先知原來中文版只有日文配音，板口博信為此更反問記者，覺得有無需要「地道」配音，不過我哋當然第一時間話「日文好啲。」更能保持遊戲神髓。
雖然訪問限制多多，不過板口博信言談間相當Friendly，帶病上陣亦無欺場，值得一讚。
板口博信訪問精華：
藍龍Fans 現場試玩
學生哥阿賢放學到嚟試玩會，雖然佢未有XB360，不過玩過之後，認為難度高，有挑戰性，想叫媽媽連遊戲一齊出機。
阿Lo同樣未有XB360，不過見到《藍龍》畫面真係有啲心動，加埋《藍龍》即將推出中文版，都有打算入貨嘅衝動。
阿泉覺得畫面好似卡通動畫，初頭望落仲以為係《龍珠》Game，本身鍾意玩RPG遊戲，所以對《藍龍》亦好有興趣，不過一定要等中文版出先會玩。
Rick係XB360機主，本身對動畫同遊戲都好有興趣，不過佢對中文版《藍龍》推出反應一般，因為佢識日文，加上覺得玩日文日語RPG遊戲會比較原汁原味。
中文版《藍龍》殺到 日版降價
《藍龍》中文版下個月就會到港，有唔少人等咗好耐，一直忍手嘅玩家，終於可以享受中文RPG遊戲樂趣，而原先已推出嘅日版，自然較少人問津，現時所見，日版價錢已跌破一百大關，標價$99，如果唔介意玩日文《藍龍》，$99就可以買到隻好遊戲，都幾化算㗎！
銷售點：I-Gamer（27253338）
中文版官網：www.bluedragonthegame.com
推出日期：5月22日
售價：$299
查詢：XBOX（800964215）