狗爪螺又名皇冠螺，相貌兇狠，一般寄生海邊礁石縫，喜好聯群結隊「揦埋一株」，在港偶爾於西貢大浪灣亮相，單憑外形，難以想像佢原來食得，仲要好食。偏偏在歐洲，不少好食之徒愛之成狂，不惜攀岩涉水摘得就摘，話其味道「甜若龍蝦、鮮似生蠔！」講到咁勁，今個春夏交季，香港終於有得食。
記者：劉嘉蕙
攝影：陳陶鈞
Model：Priscilla（TheGroup）
法國種特別樣靚
有云外國的月亮特別圓，唔知係咪有咁「蹺」，法籍狗爪螺（GooseBarnacle）生得特別四正。現場比對，港產狗爪螺完全得個殼，唔似法籍同宗造型咁有層次。agn囗sblepaingrille餐飲部經理Christophe指，狗爪螺喺西班牙、葡萄牙及法國菜中被奉為珍品，每年4月至6月先有得食，今次引入香港，亦只有京士頓街分店獨家供應，想食之人唔好行錯去禮頓道。
狗爪螺沙律$120
餐廳深明香港人愛搞花臣，特別加多味沙律食法，仲專程入口法國ChiliJelly做沙律Dressing。沙律味道酸咪咪帶點刺激，令螺肉更爽口，雖然佢脫殼後混入菜中唔多覺眼。
清灼狗爪螺$260
學Christophe話齋，要完美呈現狗爪螺鮮甜，惟有白灼。此道清烚狗爪螺參照法式正宗煮法，以海水溝淡水烚，30秒內必須撈起，使其有咬勁唔會韌。入口有海洋之味、咬勁介乎蟶子與象拔蚌之間，脆中帶腍，的確係夠鮮甜。西班牙式食法會加陳年紅酒醋。記得食埋伴碟烤麵包加鹹牛油，齒頰留香。
狗爪螺小檔案
狗爪螺學名藤壺，乃一雌雄同體生物。藤壺以肌肉長足吸附岩縫之中，堅硬外殼保其不受風雨所摧。每逢潮漲，佢會打開硬殼，以頭部附肢濾食水中浮游物。此螺除味道鮮美外，亦含豐富碘、鈣及蛋白質，外國要有牌先可以捕獵，仲要靠人手一束束鏟起。
香港狗爪螺一般係漁民「私房美食」，熱門煮法係白烚，雖然港產螺唔似得外國貨頸長有肉，但遇熱時外殼會爆開，剝走層表衣再剔走內臟，肉質一樣鮮甜，有時去西貢海鮮店都會搵到。
其他魚類鮮甜當造
海鮮食開有癮，食完狗爪螺仲口痕，可試餐廳其他海鮮菜式。
蟹肉濃湯燴芒魚$238
法式食法係將芝士倒入汁中，等佢慢慢熔，烤麵包搽醬，再點個汁食。芒魚嫩滑，醬汁香濃，烤麵包醬有好香蒜味，配搭精采。
藏紅花汁香煎沙甸魚$88
沙甸魚薄煎，面帶脆，加上適量藏紅花及胡椒粉吊起味道，整道菜有一種沉厚質感。
香蒜麵包糠伴鹹鱈魚$198
成道菜講究Combination，以海鹽醃製再煎香的鹹鱈魚，重點係加埋墊底的綠椰菜一齊食，椰菜極爽脆，令鹹味瞬間中和，再點碟旁雜菜番茄醬，好好味。
agn囗sblepaingrille
地址：銅鑼灣京士頓街2至4號名店坊
1及2A舖（25770370）
營業時間：星期日至一12nn-11:30pm；
星期五及六12nn-12:30am
