賣A貨醜聞傳遍神州，自由行唔想做水魚，本地零售業都驚「五一黃金周」冇以前咁好景。「百貨一哥」利福國際嘅董事總經理「細劉」劉鑾鴻，噚日喺股東會後就話，從來冇諗過旗下崇光百貨（SOGO）有A貨問題出現，因向來信譽良好，生意自然旺。
唔擔心中央出招
有幾旺先？細劉自爆，話今年首季生意額增長約10%至15%，只係好多香港人趁復活節外遊，搞到4月頭淡靜咗啲，近一兩個星期已經回升番。嚟緊5月，佢好有信心SOGO跑贏同行喎。
最近內地經濟增長高於預期，市場擔心中央出招打擊，細劉就話唔使擔心，皆因同胞越有米，對百貨嘅需求就越大，公司截至舊年底有成26億元現金，即使投資蘇州同埋瀋陽項目，暫時都唔使考慮發新股集資。
[email protected]