Barclays噚日用910億美金，買起ABN荷銀，除咗締造歷來最大單銀行購併紀錄，仲令自己成為全球第五大市值銀行…呢單真正世紀大刁，眼睇似乎同我地風馬牛不相及，但實情分分鐘同廣大股民同埋屋邨商戶息息相關──事關呢單刁嘅「幕後黑手」，就係領匯（823）股東之一、有「頑童基金」之稱嘅TCI！
TCI一直打着「為股東利益」嘅旗號搞破壞，響朵之作係05年搞禍咗德國交易所（DeutscheBorse）收購倫敦交易所（LSE），兼迫德交所主席同CEO落台。呢單新鮮熱辣910億銀行大刁，TCI創辦人「大鐵鎚」ChristopherHohn，月初喺荷銀AGM動議，將荷銀拆骨…結果，荷銀最後咪賣咗囉。
至於TCI其他「小規模起義」，除咗上個月「要求」佢哋hold住9.9%嘅日本電源開發（J-Power），將末期息增加兩倍，另一單就係今年1月領匯易帥。TCI舊年先派件董事何志安入領匯董事局，之後，江湖傳聞，領匯主席鄭明訓「扮醒目」，飛去英倫拜會「大鐵鎚」。諗住先禮後兵，點知，露埋底自己冇REITs管理經驗，斷正畀「大鐵鎚」。最後，仲響今年1月落埋台！冇陰功。
趁聖誕玩鑊甘
不過，呢劑對領匯嚟講未必係最甘。皆因領匯05年11月25日上市，講明上市頭兩年，唔可以搞搞震，踢走鄭明訓之餘，仲想走一啲冇乜建樹嘅管理層，呢啲只係小意思，再者，個個細路仔都鍾意趁聖誕玩鑊甘，到時真係乜都有可能發生…大吉利是講句，到時TCI如果郁手，嗰陣就真係有破壞冇建設，日日都係聖誕節。
[email protected]