免費報紙《都市日報》啱啱喺上星期五慶祝完五歲生日，仲有高官到賀，不過，佢阿媽MetroInternational噚日公布首季業績就差強人意，蝕咗1430萬美元（約1.11億港元），好彩香港、智利、葡萄牙及荷蘭業務有強勁增長，有啲驚喜。
雖然傳統報章市場競爭越嚟越激烈，但香港嘅《都市日報》上季銷售額勁升26.1%，叻過母公司整體嘅10%增幅，期內廣告量增加11%，每頁廣告價格增8%，經營溢利都好勁，升咗18.6%，可以話喺惡劣環境之下殺出一條血路。
雖然阿仔生性，但係阿媽公布業績之後，股價一度急挫超過16%。就連掌舵人鄧恩保（PelleTornberg）都話，虧損幅度比預期大，因為幾個重要市場如瑞典、西班牙、法國同美國嘅業務表現實在太差，不過佢都補充，每年首季嘅業績通常都差啲，有虧損不足為奇。
[email protected]