四月二十日本欄講「唔好讀經濟」，內裏談到維珍尼亞大學，據一位美國人朋友所講，有南部哈佛之稱。當日早上就收到一位讀者Daniel嘅電郵，睇嚟係一位住在美國嘅讀者，因為佢提到話長期睇本欄，令佢知道香港社會時事也。如果係本地讀者，相信唔會咁講。
Daniel話維珍尼亞大學係美國嘅一流公立大學，仲可能係最好嘅公立大學，但「南部哈佛」應該係田納西州嘅范登堡大學（VanderbiltUniversity），多謝Daniel提供資料。呢間大學，左丁山識㗎，因為同班一位女同學就係攞咗福特基金會獎學金去范登堡讀經濟學博士嘅，可惜佢一去不返，杳無音訊，都唔知佢攞咗博士未，或者攞到博士學位之後，移居那一方。嶺南大學副校長饒美蛟亦曾經喺范登堡讀過。范登堡係鐵路大王，捐錢成立一間大學，以佢嘅名字為大學名字，唔少美國私立大學都係如此，例如哈佛、耶魯、史丹福等名校就係以捐款人之姓名為名。有啲香港人講英文名，講Vanderbilt、Stanford講得好自然，用廣東話講「港大李嘉誠醫學院」就唔自在，要反對，都唔知反對乜。
牛津大學得李嘉誠基金會捐款二百萬鎊（現值三千餘萬港元），校監彭定康都唔知幾多謝，歡喜到不得了。英國大學比較少私人捐款，同美國私立大學相差好遠。可能與（一）無稅務優惠，（二）歷史習慣向政府伸手兩者有關。日本大學仲可憐，幾乎冇富翁捐款。最出名嘅東京大學開始覺得資金唔夠，發動一個籌款活動，希望由現在到二○○八年籌款一億美元，少唔少啲呀，《金融時報》話哈佛大學籌款一億美元，只係舉手之勞，森瑪斯之前嗰位校長退休後，統計過佢每日為哈佛籌款一百萬美元。即使係港大，中大最近三年，每年都得到捐款四億五千萬元，唔使兩年就升過一億美元。比較起嚟，香港啲富有人士算係好慷慨，值得稱讚。一個人擁有財富超過一億，根本好難使得晒，包三個明星就例外，超過一億嘅錢最好捐晒嚟辦教育。