車路士豪花數十億後，終於再次打入歐聯4強！喺未作客華倫西亞前，作為車仔球迷嘅小弟，認為車仔8強止步。不過，憑住作客呢場波嘅表現，車仔完全有能力殺入歐聯決賽！
𠵱家，真係可以用今時唔同往日嚟形容車路士，作客華倫西亞竟然可以擁有壓倒性嘅攻勢，車仔球員喺接近完場嘅時候，依然有跑不完嘅氣力！至於利物浦，其實只要睇實謝拉特，紅軍已經無咗一半功力！車仔唔輸作客入球畀紅軍，就可以保住出線機會！
另外，我認為車路士可以贏波嘅主因係利物浦鋒芒過露！紅軍所有招數，似乎大家已經領教過。反觀車路士，除咗洛賓及波歷克之外，完全無傷兵，可以隨時變陣，所以，我點都睇高車仔！
至於曼聯對AC米蘭，曼聯做過3冠王，會唔會今次做3亞王呢？我覺得冇可能，因為曼聯應該喺歐聯4強止步！點解？因為曼聯傷兵無數，中堅竟然用布朗，對米杜士堡呢場波，布朗完全無料到，有佢一日，曼聯一定會輸畀AC！
周鵬
商業1台《球迷集中贏》主持
電郵：[email protected]