噚日去金鐘做Facial，出地鐵近A出口位置時，瞥見多了部「皇冠流動書屋」，愛閱讀而富文化氣質的我，即時駐足。查實皇冠出版社去年10月已於銅鑼灣地鐵站內推出首部自助賣書機，噱頭夠晒，但憑個人日常觀察，使用率似乎唔多高，畢竟書機內只得十幾款書種，又只局限於單一出版商，真正想買的心水書就未必有。雖然係咁，但出版社趁昨日「世界閱讀日」添食，分別於佐敦地鐵站（C出口）及金鐘地鐵站（A出口）增設流動書屋，我諗單係宣傳效果都值回票價。以後去旺區都幾乎可以用八達通嘟一嘟就買到本書。而且新賣書機將獨家發售三本梁望峯作品的限量親筆簽名本，包括：《WE1惡魔天使（作者足本版）》、《WE2與維納斯的最後相認》，以及新書《WE3當企鵝愛上悲傷的北極熊》；推廣期間所有書籍均以9折發售，咁又確係「嘟」得過喎。
三妹
文靜卻不內向，不但有藝術家氣質也具藝術家脾氣。