麥當勞的至尊漢堡好好賣，就知道香港人好鍾意食漢堡包。不過食得多麥記，總嫌悶。美式餐廳MainSt.Deli趁6周年紀念，推出矜貴漢堡，用上澳洲M6和牛肉配鵝肝、加拿大原隻龍蝦、銀鱈魚加帶子做餡料，口味創新，一咬爆漿；而且大大個，真係要用刀叉嚟享受㗎！
記者：梁學文
攝影：陳偉強
Model：Mandy@theGroup
MainSt.Deli一向以漢堡包見稱，過去6年都推出過唔少特別口味的漢堡包，例如吞拿魚漢堡、鴕鳥肉漢堡同火雞漢堡等，款款都夠特別，而且出名用料上乘，全部漢堡都會用上新鮮的材料做，連配料都唔會馬虎，真係可以做到生菜嗦嗦聲，番茄又甜又多汁。好似今次新推出的和牛鵝肝漢堡就落足料，用澳洲M6和牛肉做，夠juicy又重肉味，仲釀入鵝肝，味道更豐富。
材料高級新鮮
師傅Mr.Hoo只會揀靚料，佢話：「我哋特別揀高級嘅食材，好似M6和牛咁，質素有番咁上下，做漢堡比用安格斯牛肉好好多。而且我只會揀運動多啲嘅後腿肉，因為更加嫩。其實最重要係客人食得開心，食完仲會帶朋友嚟，我哋就最高興。唔只因為咁樣我哋多啲生意，而且我好想將好食嘅嘢同其他人分享。」憑住呢點，Mr.Hoo就在這裏工作了6年，即是6年來MainSt.Deli都無換過大廚，質素有保證。
餡料keep住變
搞咁多嘢，又和牛又鵝肝，全因客人要求高，師傅Mr.Hoo又鍾意搞搞新意思，他說：「香港人對食嘅要求高咗，連漢堡包都要講juicy，你睇麥記要推出至尊漢堡就知啦，所以我哋都一樣要成日變，好怕無新意，客人食得多會悶。我會試吓用唔同嘅牛肉，仲要搞吓花款，釀其他料入去，或者用龍蝦拆肉做漢堡，食嘅人開心，我做嗰陣又好玩。」
爆漿感覺勁爽
靚材料之外，每款漢堡都內有亁坤，令人食落有驚喜。Mr.Hoo說：「自從星爺套《食神》之後，忽然多了一個新名詞叫爆漿，所以我有啲漢堡都會有呢個效果，不過食嗰陣要小心啲料咇出嚟！」另外，如果想食得衞生又健康，Mr.Hoo教路要食medium以上，因為漢堡肉唔同一般做牛扒的牛肉，太生可能仲有細菌。
WagyuBeef&FoieGrasBurger$338
M6和牛入面釀入矜貴的鵝肝，製作的時候工夫多，而且仲有爆漿的效果。師傅話工夫主要是花在釀製鵝肝，因為先要煮熟鵝肝，再切細，然後才可以釀入牛肉入面，至可以去燒，所以都幾大工程。牛肉入口夠滑夠juicy，而且有一種炭燒的味道，再加上鵝肝香濃的味道，漢堡變得又香又滑。
醬爆位：小心牛肉內的鵝肝一咬咇出嚟！
LobsterBurger$338
龍蝦漢堡用加拿大龍蝦拆肉做，拆好肉之後就分開兩部份，一部份用手切粗粒，另一部份就用機打成蝦膠，然後再將兩部份撈勻，釀入cheddarcheese同龍蝦箝才落鑊炸。彈唔彈牙都係次要，最重要係好有蝦味。
醬爆位：一咬小心入面的芝士流到四圍都係！
醬爆位：一咬小心入面的芝士流到四圍都係！
MonsterBeefBurger
8oz$138/12oz$178
Monster是指份量夠多又夠大，十足十怪獸食的份量。牛肉上鋪上一層洋葱圈，再配酸瓜洋葱蛋黃醬，酸酸哋好醒胃。
BlueRibbonBeefBurger
8oz$138/12oz$178
這款藍芝士漢堡用上8oz的美國牛肉做，足足比麥記個至尊漢堡多5oz，再加入用焦糖煮過的紅洋葱，鮮甜十足。
TheUltimate54Burger$148
大堆頭的製作，份量足夠兩個人分享。除了有牛肉，仲有雞蛋、煙肉、生菜同菌類等，配白麥包味道最好。
SouthernfriedChickenBreast$138
雞胸肉用buttermilk浸足24個鐘，夠香夠滑。配EnglishMuffin包，入口夾雜住香脆與煙韌兩種口感。
VeggiePrairieBurger$128
這款素菜burger，餡料有西蘭花、西芹、白菌同意大利青黃瓜等，用麥粉煎香，低脂又少油。可蘸mangochili醬嚟食。
CrispyCodCakeBurger$138
鱈魚漢堡吃起來極似魚茸，仲有一點帶子的鮮味。原來師傅將魚拆肉，加入帶子粒、洋葱、西芹等，定型後雪過夜才炸。
MainSt.Deli（23751133)
地址：尖沙嘴北京道8號
營業時間：10am-10pm
有着數：為慶祝開業6周年，4月份每個禮拜都會有6款漢堡85折發售，且每惠顧$600以上，都附送紀念禮物一份。
