時間：98年6月
人物：鍾慧儀
經過：一個人做錯事最緊要認，如果唔係繼續死撐講大話，俾人踢爆嗰陣就仲瘀。「大騎樓」鍾慧儀就係最佳例證。
96年華裔小姐季軍鍾慧儀，因有35C上圍同哈佛大學學歷而被封為「哈佛大騎樓」，點知到98年6月，有消息指鍾慧儀92年喺美國涉使用假信用卡騙財同賄賂執法人員，被判入獄一年，但係佢喺感化期未滿就離開美國，返港選美，所以俾美國執法部門通緝。呢單新聞曝光後，大騎樓力稱俾人誣衊，但又拒絕返美證明清白。
湯盈盈代還債
直至98年7月31號，無綫經過調查之後，發現鍾慧儀真係坐過監兼向大會虛報資料，即時同佢解除合約，褫奪佢華姐季軍名銜。
鍾慧儀當時炒燶孖展，欠落70幾萬，仲連累埋同佢夾份炒股嘅好朋友湯盈盈，據知湯盈盈仲幫佢孭咗幾十萬債。
到咗99年3月，鍾慧儀突然主動返美自首，結果佢因違反監管令，被判入獄6個月，同年9月出獄，之後銷聲匿迹。
本欄逢周一至周六刊出