周日續避開主流聯賽，卻是個人認為加注重擊良機！選鬥志如虹嘅狼隊殺敗英冠名牌球隊伯明翰；次選回到荷甲兩支強隊身上，常規聯賽最後一次主場出擊，博佢哋齊炒對手兼開「大」。
原本想搵雙「阿」做重心，不過兩隊周中盃仔齊齊波盤皆贏，令賠率更見雞肋，決改以小博大方式過關下注；力爭冠軍嘅阿積士主場對鹿特丹斯巴達，「讓球主客和」要[-2]，即係「主勝」要贏3球，但都係得嗰兩倍，不如敲波膽阿積士勝5:0（10倍）同埋主其他（10倍）仲抵博。
阿積士AZ入球必多
阿積士有賴恩巴布同亨特拉爾已經夠入3、4球，今場仲話可能加埋堅尼夫佩雷斯踢3前鋒，你話踢風流波嘅斯巴達點頂？
至於阿爾克馬爾（AZ）迎海倫芬，就真係名副其實嘅「大」戰；前者有一對多產前鋒高化文斯同艾維拿斯，後者亦有入球停不了嘅歐洲金靴獎前列分子艾方素，唔怪得呢場嘅入球大細，足智彩寧願保持中位數喺2.5球，再將個「大」嘅賠率㩒低至1.48倍，都唔將中位數調高到3.5球啦！想食大茶飯，小注買波膽啦！
狼隊保夫萊特復勇
英冠重心方面，狼隊未計昨天聯賽，排邊緣嘅第6位，要全力爭升班附加賽位置；隊中曾去過意甲搵食嘅箭頭保夫萊特突然復勇，近兩仗攻入4球。
翻查呢位老哥今屆7場有入波聯賽，球隊不敗率高達8成半，而且對手伯明翰中堅查廸助攻厲害，保夫萊特復勇，查廸未必敢肆意助攻。何況伯明翰周中多踢1場硬仗，雖然呢隊波同筆者好有緣份，但今場爭勝意欲冇對手咁強，所以要反手貼翻狼隊主場坐和望贏！
重心出擊
讓球
狼隊(平)
蘋果波神
狂迷英國波，尊崇雲格；成與敗，視乎你是否找到真快樂！