早前有新聞話小朋友會越鬧越蠢，其實世上無蠢仔，做得醒目仔必有以下10樣基本條件，快啲睇吓阿仔阿女將來有冇機會威震四海？做人阿媽，阿仔未入學點知佢醒唔醒，將來有冇成就呢？其實有樣睇㗎，特別係耳高貼腦，聰明過人。
記者：區佩嫦
資料提供：方海閱
（www.fonghoiyue.com.hk）
1.耳高聳揚名揚四海
耳嘅高低一般以「上與眉齊，下與鼻齊」為標準。若耳稍高於眉，色比面孔白，加上耳形靚肉厚，代表聰明過人，記憶力特強，長大後能名揚四海。
2.耳貼後腦專業成就
耳朵越貼後腦越好，最好係連企喺對面嘅人都睇唔到，有呢種面相嘅人，細個時非常聽話，長大後喺讀書或事業上很有恒心，能夠排除萬難，受同事及師長嘅尊重。
3.耳上有痣有大智慧
痣有活和死之分，活痣色深，有光澤；死痣色淡，冇光澤。若耳上有活痣，呢類人相當聰明，觀察力強，表面睇可能唔聰明，實則擁有大智慧、大成就。
4.額角凸出創作力強
額角兩邊較少頭髮，令額角凸出，加上額高飽滿，無論男女，都好有創意，記憶力特別好，有呢種面相嘅人是讀書嘅好材料。
5.額高飽滿聰敏過人
額頭高闊飽滿嘅人，智力及觀察力都較強，天資聰敏，少年運好，學業成績也較理想。
6.鼻樑長直思考力強
鼻長且高、鼻樑直嘅話，代表呢個人有很強嘅思考能力，即使小小年紀亦好有主見，可以話係資優兒童之相。
7.眼睛有神成績理想
俗語說︰「眼是靈魂之窗」，若雙眼黑白分明，且充滿神采，代表孩子智力過人，讀書成績理想。
8.眉稜骨凸創意無限
眉稜骨即是眼眉骨，若眉骨凸起，又有肉包住，代表呢個人創意無限，奮鬥心極強，具有先知先覺嘅能力。
9.眉清見底分析力強
若眉毛每根都睇得清楚，而且不會雜亂無章，加上眉形整齊及靚，代表分析力強，做事有恒心。
10.頭髮順滑 醒目
毛髮代表聰敏程度，若頭髮和眉毛烏黑柔順，兼充滿光采亮澤，代表聰明仔，智力高。
無醒目樣都掂！
無以上特徵都無緊要，想讀書叻識擺書枱都有發圍。
1）有靠山︰書枱嘅座位宜背住牆或櫃，代表有靠山，易得貴人提攜。
2）沖房門︰書枱不宜對住房門，否則會好易心散。
3）對正窗︰書枱應背着窗口，可利用天然光外，又唔怕太陽曬住影響情緒。
4）避橫樑︰書枱不宜放喺橫樑下，只會畀小朋友造成壓力，令佢頭昏腦脹。
5）勿對尖角︰若書枱對住屋角等尖位，會妨礙學習心情。