恒基地產舊年用8.25億，成功買入灣仔金國大廈同國民大廈92.31%股權，發展商一方面同小業主磋商收購餘下嘅權益，另一方面就向政府申請強制拍賣，實行雙管齊下，為咗唔想浪費時間，恒地又向屋宇署申請建築圖則，2月已經獲批。不過，重建內容就有啲令人意外。
其實舊年兩幢大廈逾九成業主聯合標售時，市場都以為中標財團會重建做商廈，爭取最高嘅地積比。但政府批出嘅建築圖則，原來地皮面積最大嘅金國大廈，恒地係諗住起商住樓，只係國民大廈先申請起商業樓。
若果以兩個地盤齊齊起商廈計，夾埋可以有23.9325萬呎，但𠵱家只係得18.471萬呎，計落少咗5.4615萬呎，即係少咗22.8%，睇落好蝕底喎。
睇番地圖，近高士打道嘅金國大廈，會起一幢43層商住樓，而後面嘅國民大廈就起一幢32層商廈，即係話金國大廈重建後，單位會有無敵海景。
賣過萬蚊一呎無走雞
咁華華又畀啲例子大家睇吓，喺金國大廈隔條馬路嘅商廈新銀集團中心，呎價約6000蚊；反觀同區住宅新樓尚翹峰同嘉薈軒，平均呎價都要7000蚊，而嘉薈軒高層仲可以去到過萬蚊一呎。金國大廈個位比起上嚟仲正，咁賣過萬蚊一呎咪應該無走雞。計番條數，其實起住宅會賺得仲多。恒地主席李兆基果然數口精。
當然，批咗建築圖則唔等於一定只可以起住宅嘅，一旦商廈市道狂升，發展商可以再入申請，起番商廈都一樣得㗎。
華華較有興趣係恒地未收購到嘅小量業權，個收購價係咪會提高啲呢？
李華華
[email protected]