PS3高清打機威力，相信就算好多現役PS3機主都未必睇過，皆因佢個1080p高清畫質，都唔係咁多舊款LCDTV食得起！最近SCEH就同香港網吧——i-ONE破天荒合作，喺旺角、銅鑼灣兩個潮人朝聖地，玩咗個高清試玩會；32"靚畫BRAVIA配PS3，雖知呢個係好多Gamer夢幻組合，入場費閒閒哋都上$15,000！𠵱家就免費任你試打到5月尾。
記者：許福合
攝影：楊錦文
ImageGirl：Mandy
唔使收錢輪住試打
上網吧打OnlineGame大家就試得多！但上去打PS3家用機，絕對係香港嘅首次；所揀選嘅網吧係近年旺角、銅鑼灣大熱嘅i-ONE，喺嗰度仲專登劃出一個PS3區域俾人任打！基本兩間i-ONE各自有4部32"BRAVIA配PS3（合共8套組合）供人試打！最正係費用全免，入到去坐低就打，未買PS3又或想Upgrade部電視嘅PS3玩家，都真係值得去試吓！
就現場所見，好多PC玩家都忍唔住誘惑，走過去試打！衝口而出對PS3嘅觀感，係畫質靚似戲院級、從未體驗過打機可以有咁靚畫質，係第一次親身感受到PS3嘅高清威力！基本長時間都有10多人排隊等住打，以規定每人可試打10-15分鐘來計，平均輪機時間都要上30分鐘，如果撞正4-7點呢啲繁忙時間，等粒幾鐘都係等閒事！
暫時高清試打會，仲未有提供更換遊戲服務，全部PS3會預先放上最新《Resistance:FallofMan》，喺度除可玩上網對戰外，亦可以玩到4人區域聯網模式（類似電腦遊戲LAN對戰），除非你家中有數部PS3，否則呢種區域連線打法，全港只此一家！
PS3網吧要授權？
見到網吧都有PS3試玩，第一個念頭就係將來有無可能出現全網吧都係PS3、XB360、甚至Wii家用遊戲機嘅網吧呢？答案係短期內都唔會出現，據知原來現時一般家用遊戲機都有條款，規定唔可以作公開使用，今次i-ONE亦係因為得到SCEH授權，先至可以提供免費試玩。
即場試玩PS3
免費打PS3咁着數，自然吸引唔少人嚟免費打機，當中部份未有PS3，想上來一試睇吓質素，亦有已經係PS3機主，上來試吓PS3變街機嘅感覺！
阿業非PS3機主
買機就連靚電視
阿業雖然係超級機迷一名，不過暫時仲未買入PS3，原因係屋企部大電視經常被人佔據，無個大電視去玩PS3覺得好浪費，所以未下定決心出機：「今次見到有得免費試玩，仲有高清電視，就想上嚟睇睇係咪真係咁靚囉！」玩完過後，阿業對畫面質素讚不絕口，不過要連電視出機都幾肉赤，想買！但要再計吓條數先！
心水PS3遊戲
《R:FOM》：槍戰夠刺激，現場感十足，怪物近身會被嚇一跳。
阿安PS3機主
區域連線好熱鬧
對於已經擁有PS3機主，其實亦對網吧提供PS3試玩好有興趣，阿安買入PS3無耐，對可以40人連線對戰嘅《R:FOM》最感興趣：「聽到網吧有得試玩，就想試吓連線嘅玩法」，試過之後，佢話網吧同一班人一齊打機熱鬧好多，又可4人或網上連線，玩落好有街機風味！
心水PS3遊戲
《高達無雙》：《無雙》遊戲一向係佢心水至愛，《高達無雙》畫面震撼程度前所未有！
GregorineXB機主
畫質靚到想出機
連玩開XB嘅法國人Gregorine都來到試玩PS3；佢話鍾意XBLive網絡對戰玩法，不過對PS3畫面質素之高亦相當有興趣，可能都係時間出番部！
心水PS3遊戲
《R:FOM》：真係現場感十足，聲效亦唔錯，連線玩法亦夠多元化。
CanullePS3機主
試後即買《R:FOM》
法國人Canulle極鍾意玩第一身射擊遊戲，所以見佢試玩《R:FOM》時，真係流晒口水，試後仲大讚用BRAVIA配PS3，畫質正兼操控一流，試打會後，仲話會買番隻Game看門口！
心水PS3遊戲
《NBA07》：NBA亦係佢至愛，《NBA07》畫面真實度高，佢同唔少波友都好鍾意。
AugusrinPS3機主
想換《GTHD》做試玩
同樣係PS3機主，法國人Augusrin話射擊遊戲雖然刺激，不過講到底都係對《GT》系列感興趣啲；佢仲話如果能將下載版《GTHD》，放喺度供人試玩就最好不過，始終得一隻遊戲，未必人人啱。
心水PS3遊戲
《GTHD》：玩晒咁多代《GT》，玩過《GTHD》試版，極期待正式版推出。
活動資料
日期：即日至5月31日
地點：i-ONE
1.旺角亞皆老街24-26號東方大廈4樓
電話：23917800
2.銅鑼灣怡和街2至6號英光大廈11樓
電話：29884828
費用：全免
查詢：SONY（23452966）