曾一度備受濕疹和「鬼剃頭」困擾的鄭秀文（Sammi），經過一年休息後，已全面復出，現正忙於為下月舉行的七場紅館演唱會排舞。不過她復工之餘也毋忘歎美食，接連兩晚包場消夜顯架勢，為食的Sammi更冒濕疹周身痕復發之險，攬仔狂擦辣蟹和海鮮刺身。
鄭秀文下月將假紅館舉行七場演唱會，連日來正忙於為個唱秘密練兵。前晚8時，素顏的Sammi戴黑框眼鏡，以一身輕鬆打扮，坐保母車離開大坑香閨，直往九龍城一間排舞室綵排。
擦瀨尿蝦辣蟹
早已在場等候的10名女fans乍見Sammi大為興奮，簇擁她落車及護送上樓，這班忠心fans更獲厚待，獲准貼身睇偶像跳舞綵排。
經過五粒鐘排練後，跳到㷫的Sammi面紅紅離開，現場見她心情勁靚，笑容滿面，而且水腫略消，面頰明顯變尖，身穿T恤和頸纏粉色毛巾的她掛上斜孭袋後，盡顯平胸美。她在fans包圍下，拿着玩具大眼鏡及小禮物等登上保母車，到數碼港接一男一女友人後，再駛至明星飯堂喜記開餐擦蟹。
當時Sammi一枱共坐五人，他們包場閉門開餐，所點菜式包括椒鹽瀨尿蝦、上湯水蜆、橋底辣蟹、串燒鱔、泥蜢粥、豆豉鯪魚炒A菜和蟹油炒麵，非常豐富。
稍見青絲疏落
雖然Sammi曾患濕疹，又被指出現鬼剃頭，前晚其髮鬢也稍見青絲疏落，但饞嘴的她懶理啖海鮮易令皮膚敏感復發，一於開懷勁擦，其間更開心得向鏡頭鬼馬戚眉，至凌晨近4時大快朵頤後才返抵香閨。
其實大前日凌晨2時多，Sammi排舞後也曾偕前晚擦蟹的一男一女友人到灣仔春園街佳文吃消夜，享用她至愛的海鮮刺身，已置濕疹於度外的Sammi當晚又玩包場顯架勢。由於Sammi為該店熟客，老闆更特別為她延長營業時間。她飽餐後偕友上車，返抵家門時，還與同行男友人深深擁抱道別。
採訪、攝影：娛樂突發組
專家話：食海鮮濕疹加劇
一直受到哮喘與濕疹困擾的鄭秀文，日前竟不理會濕疹的病況，大擦橋底辣蟹等海鮮，其實患上濕疹是否要與海鮮講再見呢？皮膚專科醫生陳衍里昨日接受電話訪問時說：「患濕疹嘅人食貝殼類食物，皮膚會更加痕癢同嚴重。濕疹只係俗稱，因為皮膚上出現紅疹出水，其實係屬於皮膚炎，皮膚炎分三個唔同種類，分別係小兒濕疹、主婦手同接觸性敏感性皮膚炎，成因唔同，醫治嘅方法係減低刺激性用品，塗用一啲類固醇藥膏等。」
