點解一啲風水高人咁值錢？一千億當然甚為誇張，搵幾百萬以至一千萬嘅，應該有唔少。所謂風水師並非只係睇風水，而係包埋算命、睇相，尤其係睇相最為重要。點解呢？
十幾年前律師Ｔ叫左丁山去中華總商會俱樂部食飯，畀高人Ｙ睇吓相，高人Ｙ自加拿大來，律師Ｔ與某位闊佬請佢食飯。左丁山一去到，高人Ｙ叫左丁山行一個圈，再坐定定畀佢望清楚，五分鐘後，佢就講：「你一定唔會發達，今年單投資最好唔做，做則蝕大本。」左丁山暗罵佢多餘，食完飯就唔記得晒。投資當然照做啦。一年後高人Ｙ又來港，律師Ｔ叫去食飯，見到高人Ｙ，佢笑笑口咁講：「你一定冇聽我講嘅，輸晒喇？」唉，輸到入肉，痛到入心㖭，冇得同佢拗。
高人Ｙ後來雲遊他方，專做闊佬顧問。原來睇風水都係次要，最緊要識睇相。闊佬要（一）請高級董事級職員，（二）與高官傾密偈，（三）與客戶傾大生意，就會搵埋高人Ｙ一齊與高官、候聘人、客戶食餐飯，或索性以顧問身份參加會議。高人Ｙ唔會出聲嘅，只係聽與睇對方面相，以決定對手是否講真話，有冇運行，或者與闊佬夾唔夾。呢樣幾重要㗎，如果對手係一個冇運之人，同佢做生意咪會累親自己？
因此咯喎，風水師實則係風水/睇相/心理分析/身體語言專家/策略顧問嘅混合體，跟老細一定要有十幾次講到好準先至得，否則老細邊度得閒對佢以禮相待，以金銀相贈？左丁山以前唔信有甚麼神秘人，自見過高人Ｙ之後，唔敢唔信，而且相信神秘人一定係一流一嘅高手。
經高人Ｙ指點過半招之後。左丁山知道好多時發達有個樣，基於大多數法則，成功之人一定有個靚鼻，凡鼻短、露孔、鼻不直，鼻頭扁平者，要用多十倍努力先會發達。得閒不妨睇吓《壹週刊》啲大頭人物相，見識吓郭炳江，陳廷驊等人以及一啲國企董事長嘅鼻（如肖鋼），有一個款㗎。