《蘋果》真巴閉，居然攞到龔如心「神秘」遺囑，擺上頭版，令人對「神秘人」嘅神功，佩服到五體投地。《蘋果》揭露呢位神秘人係TonyChan，中文名陳振聰。
在中環一帶，好多人識得TonyChan，但不知陳振聰。如果純係睇風水，得龔如心歡心，贈遺產全份（仲未知估值幾多，點都有幾百億啩），陳先生嘅風水費一定係世界紀錄，空前絕後。四月十九日另有一段「應用科技研究院」睇風水新聞，審計署踢爆應科院用咗十八萬一千元請李丞責睇風水四次，即每次四萬五千二百五十元。李丞責唔知呢一生人會睇幾多次風水，如用呢個價錢，想賺五百億嘅話，要睇1,104,972次，每日睇一次，要三千零二十七年！嘩嘩嘩，點有可能吖！
睇《蘋果日報》刊登嘅兩份遺囑，○二年七月二十八日嗰份用中文，有兩位見證人，以我哋普通人，非專業眼光睇，真確性好似冇乜疑問。不過咁喎，內容只係話龔如心離世後，「我所有財產撥歸華懋慈善基金有限公司」，好似唔夠精確，何謂「所有」？可以爭論；反而「神秘人」嗰份遺囑，用英文，對遺產嘅界定，就好精確，講到Alloftherest,residueandremainderofmyestate,bothrealandpersonal,ofeverykindanddescription,whereversituatedandwhethernowownedorhereafteracquired，定義十分廣泛，包羅萬有，係十足法律英語，肯定係法律界人士起草嘅。唔知道《蘋果》刊出呢份遺囑，是否全部內容呢？淨係睇刊出嘅條文，Alloftherest……令人聯想到龔如心有一份大遺產，分得七七八八之後，剩番嗰啲Alloftherest,residueandremaniderofmyestate先至分畀陳先生。莫非又有另一位或一批繼承人？如何劃分？咁多錢，唔關我哋事，但呢單新聞就太過有趣味，兼且牽涉錢銀係天文數字，即使係好正經嘅商界中人都想八卦吓，追看新聞。最後無論邊個承繼遺產都好，係意外之財啫，不如捐番一兩百億畀本港大學，教育下一代啦，王德輝賺咗咁多香港人錢，遺產捐番啲畀香港，好應該啫。