中環是藝人的掃貨勝地，日前陳慧琳（Kelly）和2R姊妹花同一時間現身中環入貨，為迎接炎夏而置裝。前者挺胸買美髮用品，未施髮術先騷哥利；被踢爆已婚的2R胞妹Race，則在SistyrMoon購下價值約2,000元、盡現激凸身形的薄紗連身裙。太陽叔叔，請快快現身吧！
近日天氣回暖，又是女星的入貨旺季，就連平日極少逛街的陳慧琳，日前也親掃美髮用品，不過未整靚髮的Kelly，輕晒玲瓏浮凸身軀已夠瞄頭，足以令男士睇到眼定定。
精挑美髮用品
上周四（19日）7時左右，Kelly偕女助手到中環擺花街的專業美髮用品公司掃貨，當時她身穿緊身白恤衫襯條子長褲，淡施脂粉、盤起髮髻，逕自揀選貨品。現場見Kelly睇得入神，擠在顧客堆裏揀洗髮水，更彎身嗅洗髮水味道，其後又細心揀梳，約10多分鐘後，終買下一袋貨物。
離場時，一馬當先的Kelly挺胸收腹，以手撥開膠簾時凸顯美好身材，尾隨的女助手則為她拎着戰利品，然後齊上保母車離開。
兩姊妹齊揀衫
同一時間，近期忙於綵排舞台劇《笑傲江湖》的2R姊妹花也在中環雲咸街SistyrMoon女裝店揀衫，短髮的Rosanne身穿粉紅色運動裝，胞妹Race則穿白T恤、長褲和涼鞋。當時兩姊妹偕兩名女友人穿梭店內，見她們對白色的背心及連身裙甚具興趣。其間Race曾到試身室試穿一襲白色連身裙，由於質料薄，故盡現激凸身段，但她表現得十分滿意，還對鏡子左照右照。
Rosanne向Race給予意見後，見她未有試穿衣服即先行離開，Race留店內繼續睇衫，最後她更購下該條價值約2,000元的連身裙，接着才與女友離開，而Race置裝後翌日即穿上新裙仔，偕姊一同出席「第五屆全球華語大學生影視獎頒獎禮」。
採訪、攝影：娛樂突發組
