方正控股（418）及旗下方正數碼（618）今年2月炒過一轉勁嘅，前者個零星期由0.49元炒高至0.85元，後者更誇，短短3個交易日由0.28元炒上0.76元，不過之後完全無消息跟尾，冇乜成交之下橫行咗成兩個月，似乎係等業績。
上周五晚兩間公司分別公布業績，方正控股應佔純利由4792萬元減至2590萬元，營業額及純利均倒退，業績繼續乏善足陳。至於方正數碼，營業額由19億元增至23億元，惟銷售成本有相若增幅，令毛利僅由9448萬元增至1.23億元，扣除成本同步大增，純利卻由2655萬元減至1493萬元。
方正控股長期業績飄忽，方正數碼幾年前仍連年虧蝕，至04年開始才獲利，唯一可炒嘅係去年5月出售約21.8%股權予浙江商人鄭福雙，憧憬新股東入主或有注資。據報載鄭氏於國內有多門生意，包括視頻產品研發及產銷，惟以上交易公布後幾個月都唔炒，諗落真係唔知有乜可炒。
陸氏狂升激成跟住上
陸氏實業（366）自從公布業績後股價狂飆，用咗10個交易日，由5個幾升到去10個幾，升幅成1倍，誇張程度可以同近期啲神仙股比。講番陸氏呢份業績，收入增長其實唔算好大，營業額僅增長約兩成，純利之所以大升8倍至2億銀，主要係得益於投資物業公允價值淨收益，由1.4億增至2.4億，呢個即係物業升值，越南樓市起飛，當然受惠。
另一原因係商譽減值由1.6億銀減至7700幾萬，亦係會計上數字，唔算真係現金落袋。
其實集團真正業績爆炸期應係明年至後年，買咗嗰兩塊市中心地建成商住項目及預售之後，故此今次業績後狂炒，係預期往後業績多過06年業績。陸氏炒上，越南概念股亦起哄，激成（184）同威鋮（1002）分別升14%及6%，前者本周五就會公布業績，到時就會對投資越南酒店嘅回報有多啲概念。