聽日係世界閱讀日，有冇霎時衝動想買本書應節？今次介紹香港中文消閒書嘅10本書之最，最細、最厚、最舊……最勁係套$24,000嘅書，我一定唔會買，因為睇書係生活習慣，唔係做Show，試問你邊日會唔做呢？
記者：區佩嫦
攝影：陳偉強、楊錦文
Mode：Vicki
查詢：森記（25754159）、三聯（28686844）
世界閱讀日與莎士比亞有關
世界閱讀日（WorldBook&CopyrightDay）由聯合國教科文組織（UNESCO）於1995年訂定，目的係向年輕人和兒童推廣閱讀和寫作，並宣揚版權意識，點解係4月23日？對文學界嚟講，莎士比亞、萬提斯．薩韋德拉，或者MauriceDruon、K.Laxness、VladimirNabokov、JosepPla和ManuelMejiaVallejo等著名作家都喺4月23日出生或辭世，以閱讀嚟紀念呢日係咪好特別呢？
$24,000，斷估冇人會用嚟買套書返屋企。呢套《中國美術全集》的而且確價值$24,000，全套60冊，本本硬Cover豪過人。全書滙集中國5000年以嚟嘅藝術珍品，並分為繪畫、雕塑、工藝美術、建築藝術和書法篆刻5大篇，每篇仲分埋朝代，夠晒詳細，可以話係中國美術嘅權威！而且全書只印1,500套，珍藏價值高！
《中國美術全集》$24,000（三聯書店）
出版社：人民美術出版社、上海人民美術出版社、文物出版社、中國建築工業出版社及上海書畫出版社
單本最貴！人生成功要訣
最貴嘅單本書又係邊本？同樣係美術書──《清代家具》，售$840。全書收錄140多件宮廷及民間的清式家具，而且全部係嚟自國內外嘅博物館和私人收藏。
《清代家具》$840（三聯）
編著者：田家青
出版社：三聯書店
最大！教你做明朝家具
Size最大嘅書係呢本《明韻．家青製器》，有晒明式家具圖樣，教你點整榫卯位，係教你仿製明朝家具的工具書！講番呢本書，尺寸係38cm闊、33.5cm高，夠晒大本！
《明韻．家青製器》$680（三聯）
編著者：田家青
出版社：三聯書店
非字典類最厚！中醫學天書
據書店表示，最厚嘅應該係醫學書和年鑒，但以我嘅觀察，醫學書厚好多。呢本醫學全書厚11cm，放喺書架最頂層，我就唔夠膽捧佢落嚟。全書收藏明朝大師王肯堂嘅9種共70卷醫學著作。
《王肯堂醫學全書》$292（三聯）
編著者：陸拯
出版社：中國中醫藥出版社
最暢銷！人生成功要訣
問十個人，十個都會答《聖經》，無錯！但唔計《聖經》最暢銷嘅書係《人性的弱點》，自1937年推出，全球銷量超過1,500萬本，今年適逢呢本書推出70周年，出版商特別重新繙譯，以後唔使再睇個骷髏骨頭樣封面啦！
《人性的弱點》 $58（三聯）
編著者：戴爾．卡內基
出版社：中華書局
最有租歷！絕版愛情小說
女仔鍾意睇愛情小說，以前嘅會睇林慕華、嚴沁等。租書店中最舊一本書係林慕華喺1980年初版嘅《蒼白的太陽》，呢本書有27年歷史，薄皮但新淨，一睇封面就知佢老，成本讀者文摘咁，幾有Mood！
《蒼白的太陽》
租金：5日$5（另$20按金）（森記）
最多人租！金庸武俠
最多人租係金庸《笑傲江湖》，書店劉生話：「一本書租約10次已經好勁，我印象中佢大約租咗15次，我唔似圖書館有紀錄，但每播《笑傲江湖》都多人租，好多人見無書就走，若果有書嘅話，可能唔止呢個數㖭！」
《笑傲江湖》
租金：5日全套$28
（另全套$120按金）（森記）
最潮！黃易大勝金庸
邊位作者係租書店王牌，黃易。佢啲書經常被租走，啲客仲全套咁租。「以前多人追金庸，𠵱家黃易Fans好多，《尋秦記》、《大唐雙龍傳》、《覆雨翻雲》都好多人跟緊！」
《尋秦記》、《大唐雙龍傳》、《覆雨翻雲》
租金：5日每本$8（另每本$20按金）（森記）
最少人租！南極傳記
要劉生搵本最少人租嘅書，𢱑爆頭兼摷晒成間書局，先搵到呢本2000年推出以嚟租咗3次嘅書。「傳記最少人吼，若果本書無人租，我哋會以超低價賣走！」呢本書講南極探險，睇落好似好吸引，點解冇人睇？
《獨自一人南極洲歷險記》
租金：5日$50（另$40按金）（森記）
最細！學好外語
講真，我曾經見過一啲5cm高嘅紅樓夢，但要搵番嚟介紹，又搵唔返？眼見嘅細書，惟有介紹呢系列嘅會話書，全書尺寸為6×9cm，仲細過部3G電話，最啱OL放喺手袋仔隨時隨地拎嚟學外語。
《中英日韓即用旅遊用語》$25（三聯）
出版社：商務印書館
老闆珍藏63年嘅風月小說
老闆喺櫃底摷咗套楊天成《二世祖手記》。全套30冊，第一冊喺63年推出，有44年歷史！「我知道劉天賜都想儲齊呢套書，我估香港得我有齊全套。」當年，楊天成同夏飛係齊名嘅風月小說家，連畫家董培生都幫佢畫封面就知佢勁！我睇咗頭10頁，一開波就講身為花花公子嘅主角太子洪挑逗緊工人個女，確係大膽！當時呢本書3日租$0.15（當時8本細漫畫只租$0.1），要劉生割愛？劉生話$1,000都要諗諗！
文人梁文道：點都要留《史記》
假設性問題：「若書櫃中只可以留低一本書，你會留邊本？」文人梁文道毫不猶豫：《史記》。「《史記》嘅古仔可以話百看不厭，睇幾耐都得。由於本書有百幾個人物傳記，我可以以朝代或事件為中心，將故事自己再編寫，增加趣味性。若想學好中文一定要睇《史記》，因為司馬遷嘅文筆好好，可以話係散文嘅經典！」
