我悠穎馳喺汽車界都叫做有啲江湖地位，好多車行同代理都會搵我出席吓記招會或者試吓車畀吓意見，所以年中都收埋唔少PressKit同宣傳刊物，當中好多都相當有創意，而且仲影到啲車鬼死咁靚，相當之有收藏價值，結果儲吓儲吓屋企都積埋一大堆。
不過咁多份PressKit中，要數印象最深刻，肯定係VolvoC30嗰份。話說嗰日一返到公司，就見到枱面放了大大個Volvo袋，我心諗，乜今次好多車一齊發布咩？做乜有咁大堆PressKit㗎？不過打開個袋一睇，嘩！裏面裝住嘅竟然係一部手提DVD機，無理由㗎，唔通Volvo進攻家電市場，家陣連DVD機都出埋？之後問番Volvo嘅公關小姐，原來係因為佢哋有張收錄咗C30介紹片段嘅DVD光碟，為免我悠穎馳呢啲大忙人唔得閒坐定定睇，所以送埋部手提DVD機俾我隨時隨地睇咁話喎。嘩！咁豪都得，唔怪得Volvo中文名叫做「富豪」喇！
悠穎馳
豪邁不羈，愛車如命，聽幾下引擎聲就知咩車！