呢幾日慳家嘅家姐好煩,俾姐夫寃住話要掉咗部舊嘅彩色噴墨printer,換部彩色雷射printer,話雷射機印相靚好多,仲寸佢話呢啲常識係人都知!家姐就同我呻,雷射機比噴墨貴成倍,問我雷射機係咪真係比噴墨機印相靚啲?
又係發揮我喺佢心目中嘅存在價值,即刻同消委會啲老友八吓。老友話消委會啱啱測試咗巿面最新12款彩色噴墨同6款雷射打印機;得出嚟結果,噴墨機印相嘅效果,同雷射係不相伯仲,有個別噴墨機印相比雷射更加清晰。不過,講到印相嘅速度,雷射機就快過噴墨成條街。好似雷射機印一張A4相,需時少於50秒,但噴墨機最快嗰部都要1.5分鐘,最慢嗰部逾20分鐘。
如果計價錢,噴墨機真係平雷射好多,好似今次總評分最高嘅佳能PIXMAiP5300噴墨機賣1,488蚊;比起雷射機最高分嘅EpsonAcuLaserC1100(但總分都比佳能嘅低)賣2,788蚊,平咗近一半。家姐聽完我嘅滙報,陰陰嘴話今次有救。
逢周一至周四刊出