江若琳、EricKwok、Krusty、劉心悠、董敏莉同王合喜等噚日去屯門出席一個小型賽車比賽，仲分晒組同唔同嘅參賽者比試，其中成績最好嘅係得第二名嘅EricKwok。至於班女仔就得個樣，穿緊身tee及短褲上陣的江若琳中途撞欄，結果搞到要行落車喺賽道旁邊離開，被out出局。Krusty被大會安排排頭位出賽，點知佢哋都係唔爭氣，唔識開車，等佢哋開到車時，人哋都過咗半條賽道。不過兩個𡃁妹貪玩，中途兩個架車平排，諗住阻住當時領先嘅參賽者。以佢哋駕車水平麻麻哋，當然難唔到人被過頭啦！
帶定$2,000落場
當大會宣布賽果各人都好驚訝，Krusty唔使包尾，原因係同場有四、五架車死火完成唔到賽事。Krusty嘅阿Jan話：「細個喺加拿大試過冇牌揸大膽車，但唔小心撞石壆。我知道今次撞爛一樣嘢都要罰錢，所以帶定2,000蚊嚟。」另外，劉心悠就最錫身，佢話：「本來想買個保險，但太遲買唔到。」
