愛新覺羅．州棠，滿洲人，血統承傳自祖先努爾哈赤。「我一向有滿洲人的生活習慣，但4年前感到滿族將會被人遺忘，所以盡力為民族做點事；漢、滿、蒙、回、藏之中，滿係一個大民族，但反而唔係咁多人注意到。」州棠每天穿起滿洲服、剃頭梳辮，他要人知道，滿人是很有趣、有特色的民族。
因為政治，現今中國社會不提及滿族，而每年「人大會議」上，各個少數民族代表中，就是沒有滿族。
愛新覺羅．州棠要堅持「不能忘本」，和清朝的士兵一樣，胸前有一個「勇」字。
記者︰劉昱蘭
攝影︰陳陶鈞
MYOB廣告內有清裝人講電話？現實都有真人版—愛新覺羅．州棠去快餐店。
滿洲人10個日常必做動作
壹 每朝剃頭梳辮
清裝同唐裝唔係咁易分得出，但見到剃頭梳辮，就一定知係大清人，所以州棠同佢嘅福晉（即太太），每朝出門前，幾趕都必定結辮梳髻。見親呢款髮式。「留頭不留髮，留髮不留頭」其實喺古時有實際作用，騎馬時唔會擋住視野，方法係將額前頭髮剃咗，後面紮起晒。
貳 必着黃色清裝出街
州棠一家踏出家門，只要唔係遠行或運動，整污糟件衫，必定着清裝。每人訂做7、8套，打開衣櫃就金光閃閃，咁多套都係金黃色，因為滿洲人好信風水命理，八旗軍、飲食上嘅八碗八碟，全都同「八」有關，因為佢哋認為「八」利大清，而州棠話黃色最利佢咁話，所以咁多件衫都一色到底。
叁 每代皆能武
滿洲人咁好打，皆因每一代嘅滿洲人，都必定有1個人習武，承繼呢個傳統。
州棠嘅仔札霖，8歲就開始學北少林嘅功夫，到𠵱家學咗11年，唔知係咪有滿人嘅優良武術遺傳，札霖獲獎無數，親眼睇到佢出拳有力就知有幾堅。
䦉 早上必拜祖先
開工前必跪拜大清國先帝努爾哈赤同埋多爾袞，州棠同福晉唔係拜吓咁簡單，真係從心尊崇。
一講到先帝統一滿洲、建立八旗、入主中原就滔滔不絕，服咗佢哋。
伍 屋企舖頭 望鄉向東北
家鄉遠在東北，但州棠居於南方，返唔到去都要每日望住，所以佢哋尖沙嘴漢口道嘅八旗照相館，要揀正向東嘅，屋企喺東北偏東㗎。
陸 返工熱播東北音樂
入到舖頭一定聽得到東北三省嘅黑龍江、吉林同遼寧音樂，州棠好同情黑龍江農民苦況，我終於都明白乜嘢係鄉愁。
柒 HighTea薩琪瑪正餐食黑米
州棠HighTea必食薩琪瑪，佢對薩琪瑪要求嚴謹，試過10幾個牌子，最後要去沙田訂製。「要鬆化有蛋味，蜜糖甜而不膩。」
捌 飲家鄉茶水
滿洲人鍾意飲玫瑰花茶，仲有瀋陽買返嚟嘅泉水，好甜喎。食煙用長身煙斗
玖 窗口貼剪紙
滿人嘅窗用一流嘅剪紙做裝飾，州棠都有Keep住貼剪紙嘅傳統。
拾 食煙用長身煙斗
滿洲人用嘅煙斗特別長身，你對比吓福晉手上嘅滿人煙斗，同旁邊漢人用嘅煙斗就知差幾遠。
查腳甲認身份
愛新覺羅．州棠說自己是滿洲人，問他怎分？他說除鞋就知你係咪滿洲人，因為佢哋嘅尾趾腳甲好搞笑，唔係一片，而係會縮埋一嚿嘅，呢一嚿趾甲就係滿洲人嘅身份證，唔到你唔認。「以前在城門或關閘，士兵就是以腳趾作記認，分辨滿人和漢人。」
