美國樓價幾年前開始勁升，好多業主都賺唔少，但係美國耶魯大學經濟學教授羅伯特．希勒（RobertShiller）話，由1890至1990年呢100年內，扣除通脹後，美國住宅嘅實質回報其實接近零；由1987年至今亦只有3%回報；隨着樓市降溫，未來10年嘅回報甚至會出現負數。佢勸人唔好過度投資喺房地產，以免損手。
financiallyfit喺《MSN討論區》度亦講：「如果計埋供樓利息、維修費、保險費、物業稅、資本增值稅、地產經紀費、通脹等項目，買樓嘅實質回報的確好低。」
扣埋物業稅賺唔多
SavoirFaire話：「我02年喺加州買樓，連埋律師費等各樣開支，一共用咗13.5萬美元（約105.3萬港元）。呢層樓現時應該升值到20萬美元，賬面賺6.5萬美元（約50.7萬港元）。但如果𠵱家賣樓，我就要畀成1.3萬美元嘅佣金同其他費用，如果計埋利息同物業稅等開支，其實唔係賺好多。」據了解，加州嘅物業稅幾乎係全美國最高。
不過，部份網民唔同意希勒教授嘅見解，仲呼籲大家繼續買樓。2kids10horses講：「買樓其實有好處，因為唔使租樓住，可以慳番好多租金；人口不斷增加，但土地供應有限，樓價長線應該只會向上。」
acabee亦認為：「隨着全球暖化，多個大城市恐怕會被水淹沒，所以土地會越嚟越矜貴，買樓其實係幾好嘅投資。」MillertheLarge話：「萬一美國將來出現通縮，資產價格下跌，經濟會轉壞，到時如果有層樓收租，或者有債券收息，都幾和味。」