屈福特喺上周六英超，因英格蘭國家隊第3號門將賓科士打失誤，作客與曼城打成1:1，成為首支護級失敗嘅球會；可憐賓仔今屆表現優異，但近仗兩個失誤足以致命，甚至俾人鬧足幾季都似！
事情發生喺53分鐘，賓仔接應後衞回傳竟然撻Q，俾曼城嘅華素爾輕易截得先開紀錄，可謂英名盡喪！即使屈福特及後由普斯堅追成1:1，但結果仍令fans哭穿臟胃！
由於屈軍現時僅得24分，同排尾4嘅錫菲聯差距11分，聯賽得番3輪，所以連「數字上」嘅機會都冇！
求大俠覺得賓科士打今季整體表現穩定，可惜球迷只會記起佢喺熱刺嗰場，俾國家隊正印羅賓遜無心插柳笠死，同埋前晚嘅嚴重失誤，遺臭幾多年真係唔知喇！
屈福特有賓仔黑到跌渣，但同係護級嘅韋斯咸，就有情場失意嘅森莫亞福至心靈入波，助球隊主場贏愛華頓1:0，保持一線生機。求大俠八到莫森亞女友妮高娜幾日前懷疑愛郎有外遇，一怒之下踢走已達談婚論嫁階段嘅男友；情場失意，森莫亞就球場得意，1球值3分，隨時係「鎚仔幫」嘅救命3分！