前幾日嘅港聞報道：「港人做愛只求交功課，快刀斬亂麻15分鐘就搞點。」享受性高潮比率全球包尾。原來中藥都有催情秘方，中醫師關之義話呢啲古代宮廷秘方的確Work，但有藥性，千祈咪亂試，除非你已經問清楚醫師，所以我哋特地刪去藥方的份量，只供參考。
睇住藥方，聽吓關醫師講催情藥材史、點樣試聽吓催情藥嘅藥性，其中淫羊藿，更可令隻公羊交配至死。
記者：劉昱蘭 攝影：陳盛臣、陳陶鈞 Model:Liz（Ig綜藝社羣）
鳴謝：關之義中醫師
10大宮廷催情秘方（已刪去份量，只供參考，請勿服用）
壹
齋睇個名已經估到，古人係由公羊身上觀察到淫羊藿有幾勁，原來每當公羊食咗呢種草本植物，就會追住啲雌羊嚟交配，唔係搞完一次就得，隻公羊仲會搞完一隻，又追另一隻去搞，直至到佢交配至死。做到死你話得唔得人驚。所以古時中醫就發現淫羊藿有補腎壯陽嘅功效。
海馬湯
藥材：海馬、九香蟲、仙茅、淫羊藿、熟地、菟絲子、山藥。
用法：碾碎成末，煎服，每日分2-3次溫服。
功用：促進性慾，興奮。
弍
康熙親試鹿茸
康熙好鍾意打獵，皇宮內有個私人獵場，每次自己殺鹿後，再煲湯食埋公鹿頭上嫩角，即刻返後宮將啲妃子寵幸一番。醫師們早知鹿茸補肝腎不足，再經康熙多年臨床實證就更加肯定。
飛燕喜春散
藥材：丁香、香附子、石灰末、胡椒、烏龜骨、鹿茸、金毛狗腎、蛇床、紫稍花、菟絲子、麝香。
用法：碾為細末，煉蜜為丸，梧桐子大小，每服一丸，津調塗於玉莖上入陰戶。
功用：女心歡洽，情動不已。
叁
乞丐食硫磺 全身㷫四圍非禮
以前中國東北部一帶有好多乞丐，嗰邊咁凍，佢哋又窮到無嘢食，就會食適量嘅硫磺暖身，食到成身㷫烚烚之餘，仲會向婦女摸手摸腳，搞到全城都驚咗班乞丐。
美女倒提金方
藥材：硫磺、茱萸、青木香、麝香
用法：碾為細末，津調入陰戶。
功用：妙極！
䦉
一柱擎天 以形補形肉蓯蓉
肉蓯蓉就生長於新疆及內蒙一帶沙漠嘅植物，咁惡劣嘅環境都生存到當然係生命力頑強，非常粗壯，一直衝天而生長，令人聯想到性，從植物外形聯想藥性，切合中國人講嘅以形補形。
素女與王母
藥材：母丁香、蛇床子、白茯苓、甘松、白礬、肉蓯蓉、紫稍花、細辛、麝香。
用法：碾為細末，煉蜜為丸，梧桐子大小，每服一丸，津調塗於玉莖上入陰戶。
功用：凡交戰，男女身體輕捷，暢美如仙。
伍
夜戰十女 麝香
麝香係種救急回魂丹藥，有魂魄就自然身體壯盛，血氣通暢，自然就會提高性慾咁話。
貼臍膏
藥材：陽起石、蛇床子、香附子、韭子、土狗（去翅、足，煆過）、大風子（去殼）、麝香、硫磺。
用法：碾為細末，煉蜜為丸，如指頭大，以油紙蓋護貼臍上，以絹帶縛住。
功用：夜戰十女不洩。
5條藥方通醫理
陸
補腎陰藥收陰
女人都要補，補腎陽係喺加強性器官嘅功能，補腎陰係助長體內性慾，所以補有個陽字啱男人補，陰就啱女人。
窄陰方
藥材：石硫磺、青木、山菜黃、蛇床子。
用法：碾為細末，房事時塗在陰道口。
柒
陰陽皆補強化陰莖
講完腎陰和腎陽，中藥講求整合，所以有啲藥方唔係單補陰或陽，陰陽兩補就即係體內體外兩方面一齊提升，例如「靈鬼展勢方」，乳香同沒藥活血補腎陰，其餘補腎陽，相輔相成加強藥性。
靈鬼展勢方
藥材：人龍、乳香、沒藥、遠志、絲瓜子。
製法：碾為細末，油、胭脂為丸如棗粒大。
用法：臨戰，納馬口內。
功用：擴展、大陰莖。
捌
藿香男女啱用
藿香醫腸胃，點可以催情？原來藿香行氣活血醫腸胃，即係通經脈補腎陰，自然提高性慾。
熱爐雙妙丹
藥材：細辛、川椒、甘松、丁香、三奈、蛇床子、肉桂、藿香、辛夷、羌活
製法、用法：碾為細末，煉蜜為丸，梧桐子大小，行房時取一丸納於陰戶。
功用：陰戶熱，興陽。
玖
集百家大成
原來古代都有神油，雖然外用，不過唔好亂試。
古代神油
藥材：野人參、鹿茸、海狗鞭、冬蟲草、海馬、大蛤蚧、鹿胎、雞子、杜仲、淫羊藿、鎖陽。
用法：噴在陰莖。
功用：興奮、延時。
拾
旱陰道亁涸都有藥食
睇番報道，原來三分一女性有陰道亁涸經驗，如果你睇過中醫知道係腎陰虛，補腎陽嘅藥方可以幫到你。
苗喜雨露
藥材：杏仁、丁香、草麻子、白礬非子。
製法、用法：碾為細末，用蟾酥並煉蜜為膏，臨戰，調塗於陰莖上入陰戶。
功用：女人如旱苗喜得雨，兩情歡洽。
食完幾時見效？
幾時見效好睇體質，好似康熙咁平時食咁多補品，底子好一食鹿茸就要返後宮都唔出奇，如果身子差就要請教中醫師點補同補幾多先見效。
