星期四上午，恒生指數跌咗四百○四點，真正原因不明，上午收市後，收到大投資銀行傳來電郵，大致內容講：
（甲）發生乜嘢事：自二月二十七日大調整後，（一）杜瓊斯指數上升6%，全年（截至四月十八日止）升咗25%，創歷史新高。納斯特克指數全年升4.2%，自二月底反彈7.6%
（二）A股全年升34%，港股升4.1%
（三）星加坡升13%，南韓升6.7%，總之一片好景
（乙）點解？（一）亞洲大公司業績理想，第二季前景樂觀；（二）前所未見咁多資金流入股市，（三）市場已消化中東/北韓嘅地緣政治風險，（四）中東基金及大富豪睇中亞洲公司，紛紛入市，最佳例子就係MaanAl-Sanea買入3.11%滙豐；（五）另類資產價格上升得急（例如黃金），相形之下，股票唔算好貴。
（丙）以後點睇？情緒樂觀，亞洲會跑贏全球大市，美國波動對亞洲冇以前咁大影響；投資亞洲可「財息兼收」（doublealphareturns），賺股賺外滙，而且亞洲股嘅PE/Growth比率多數細於一（如中人壽、招商銀行），唔算貴。
（丁）怎麼辦？買亞洲區股票！
大投資銀行睇得咁好，暫時調整應該唔怕啩？星期四下午收市跌477點，膽小者就見步行步啦。上面講到沙地阿拉伯大富豪買入滙豐，令滙豐股價升上一百四十四元（星期三上午收一百四十三個一，跌九毫），最開心嘅原來係滙豐職員，據所知，有資格以八折價錢買入滙豐股票嘅員工，今年係以三月尾至四月初嘅平均價計算，應該在一百四十元以下，八折就係一百一十二元，定價後就傳出消息話沙地阿拉伯大富豪入股，令股價上升，認股嘅職員賬面上賺到笑，唔開心就假！但最高層就要小心嘞，另一位沙地阿拉伯王子阿拉維係花旗最大股東，佢唔滿意花旗股價不振，搞到花旗要全球裁員萬七人，CEO飽受壓力，以後如果滙豐股價跑輸大市，因住佢會學足花旗咁裁員！