呢晚剛與一班美國大學生吃過晚飯，其中六位係維珍尼亞大學（UniversityofVirginia）學生，返到屋企就聽到美國發生校園槍擊事件，就係在維珍尼亞州。擒擒青轉台去霍士新聞與CNN，先知道係維珍尼亞理工大學，不是維珍尼亞大學。美國校園槍擊案不時發生，但呢次係一位南韓裔美國學生開槍，殺死三十二人，認真杰。南韓學生主修英文，應該有啲文藝修養，冇幾年啫，因乜事咁憎恨同學憤而殺人？嚡，世事難料，家長送子弟去美國留學，久唔久就俾槍擊案嚇餐死，好傷啫。
維珍尼亞大學有「南部哈佛」之稱，以前有一位鬼佬朋友好想佢嘅公子入維珍尼亞，用盡方法幫個仔寫申請入學聲明，左丁山笑佢：「用咁多力，不如申請哈佛啦！」點知呢位美國佬話：「我哋來自維珍尼亞嘅，大學唔比哈佛差！」
今年申請到美國讀大學嘅學生，大部份都已收到入學通知書或遺憾信。據美國資料。哈佛入學申請成功率係17%左右，全國著名大學嘅入學率全部下降兩至三個百分點。理由何在？有兩個理由，一個係國際學生申請美國大學嘅人數大增，另一個係因為大學嘅學費愈來愈貴，啲家長與學生諗住橫掂都係咁貴咯，不如去哈佛、耶魯、普林斯頓啦，既然學生大增，而學位數目不變，申請入學成功率自然下調。要讀熱門學科嘅話，申請成功率更低。
經濟系就唔算係熱門學科嘞，芝加哥大學經濟系除外。孫柏文小弟弟喺四月十八日畫埋漫畫叫人唔好讀經濟，本地大學經濟學教授多得佢唔少。收到浸會大學商學院院長何順文教授傳來一份聲明，澄清浸大殺經濟系一事：「香港浸會大學工商管理學院從沒有對經濟系作出任何合併行動計劃。面對三三四學制改革的來臨，以及為進一步提升學院的教研國際地位，本院有意作出相應的擴充，以及招聘更多優秀學者加入本院，其中包括經濟系。」以此示大編輯（消息來源），大編輯又去問吓一位浸大經濟系教授，教授淡然一笑，話聽其言，觀其行喎。