老翻友話用$200改Wii，就好似幫4仔碟解碼咁簡單，本來相安無事兼無乜後遺症，點知上星期「疫症」終於出現！據線報有玩家將隻美版《紙板Mario》插落去改．Wii，一撈機BIOS即死，拎去整？Game舖話：「已經打柴冇得救！」老翻界仲湧現咗好偏激嘅陰謀論：「Wii未賣前又話美日版兼容，最後反口之餘仲用呢招打擊老翻，絕過不斷升級Firmware！」
記者：陳國輝
攝影：何家亮
美版Game夾硬升級
改．Wii除可玩老翻，兼玩美、日版不同區碼遊戲，係好多改機佬Sell人一大「賣點」，不過問題亦由此生。據講，並非所有美版Game都會令BIOS即死，有Sales指，致命原因係啱啱出嘅《SuperPaperMario》：「呢隻係美版Game，但有別於同類遊戲，佢採用較新FirmwareV2.1；正常情況下日版Wii係撈唔到嘅；但假如你改咗機，佢會夾硬Update個Firmware同將BIOS升級，由於日版、美版兩種系統並唔兼容，最後BIOS只有死路一條！」店員話市面上暫時得呢款V2.1遊戲，但日後會唔會推出更多？真係話唔埋㗎！
40分鐘求助實錄！
記者喺Newsgroup搵咗死機「受害人」怪獸出嚟，佢早前就因為改機玩老翻，𠵱家部Wii已經打柴；今日專登走去深水埗黃金問吓有冇得救。
上網更新V2.2再玩
正所謂道高一尺，魔高一丈，就算好似SONY咁將PSP不斷更新Firmware？班老翻友咪一樣追住嚟破解，任天堂嘅Wii又點可以獨善其身！網上有改機佬仲公開發表言論，教大家唔死機一樣玩到V2.1或以上版本嘅方法。
台灣網友「愛麗絲」話，只要預先上網Update個Firmware做V2.1或V2.2（日版），之後玩任何Game都唔會發生問題。記者就呢件事問過店員，佢哋話未試過咁做，仲叫班「唔識死」嘅機迷試完話佢知㖭！
離譜！10分鐘改．Wii網上任睇
改．Wii玩老翻，究竟點改法？有網民離譜到將整個改機過程變成教學，擺上Vblog同人分享。拆機、焊接、還原3個步驟，10分鐘內搞掂晒，快到曉飛；不過，記者越睇越標汗，事關部Wii畀佢咁爆法兼換埋粒IC，都幾得人驚！
Wii迷唔敢亂試
乜會玩死部機㗎，梗係唔試啦！反正我玩親啲Game都係長煲類，貴少少冇所謂啦！
淨係改Firmware我會考慮吓，要爆開部機換IC，咁危險嘅嘢我一定唔試！
