有日同幾個Auntie去飲茶，埋單時人人都攞張信用卡出來爭住畀錢。說穿了，原來個個為了攞信用卡着數：一個為了簽滿指定的簽賬額換手機；一個為了儲積分換套不銹鋼煲；一個就為了積分換機票。究竟點樣至可以喺市面上近400張信用卡之中搵最多着數呢？今日我哋搵咗信用卡專家，教大家點樣開卡用卡最着數。
記者：梁學文
攝影：陳盛臣
鳴謝：hongkongcard.com
Paco是信用卡網站hongkongcard.com的網主，擁有11張信用卡的他，稱得上是信用卡專家，他說：「市面上大概有近400款唔同嘅信用卡，張張各有特色同優惠。着數優惠多的一定係消費型嘅信用卡，無論係迎新優惠，或者積分優惠都好着數。」消費型卡其實是指跟一般商戶有聯繫的信用卡，好似滙豐、citibankI.T信用卡等，就是消費型嘅卡。每年4月，幾間大銀行都會推出新的迎新優惠，即是話今個月開卡最着數。
揀啱3張夠晒數
要攞得最多着數，唔一定要開多張信用卡，Paco說：「第一件事要了解自己嘅消費方式，攞着數都要用得着，好似同油公司聯營嘅油卡，長期用最多可以慳到20%油費，不過你係有車至用得着。基本上開3張卡就夠，無必要係咁開，除非你好恨迎新禮物。好似我咁，雖然有11張卡，不過有啲其實冇用過，白交年費。」
儲分換嘢嘥氣
Paco話提醒大家：「齋儲分其實好唔實際，一來有啲目標禮物數量有限，到你儲滿分已俾人換晒；二來仲有機會遇上積分通脹；三來積分唔夠彈性同有限期，過咗就無。」好多人都話儲分換物，不過成日得個儲字，今個月明明用2,000分就換到的，下個月忽然要4,000分，積分都會有通脹。所以現金回贈、即時優惠或CashCoupon就最實際。
開卡搵着數攻略
攻略1 Cut卡要快
大約每隔半年，銀行就會推出新的迎新禮物，睇中禮物要即刻行動，之後記得Cut卡，方便下一年攞新着數，因為Cut了卡，半年內唔可以再開。
攻略2 Visa、Master隔住開
以滙豐為例，已開了Visa卡，不過又想要新的迎新禮物，就算唔Cut卡，一樣有辦法，就是開多張Master卡，同樣可以得到迎新優惠。
攻略3 變賣迎新禮物
迎新禮物其實可以變賣，好似上年滙豐的PSP，只要簽賬額夠$1,800就有1部，如果以$1,300賣出，就可以變回錢。所以最好揀有品牌及熱話的禮物，有價有市。
攻略4 即時折扣好過儲分
好多人會儲積分換禮物，但最實際還是即時的折扣。如果要儲分換禮物，應該專攻CashCoupon。另外，積分會過期，多數期限係1年，記住多加留意。
3張推介卡
一般人開3張信用卡都夠用，即是1張用於食嘢消費、1張買衫，另1張就視乎需要；有車一族可多開一張油卡，女性就不妨多開一張做美容用，而Paco則有以下推介：
滙豐卡夠實際
滙豐卡可以做膽，因為迎新禮物又豐富，而且優惠亦是各卡之冠，大眾化得來又夠實際。
citibankI.T卡啱年輕人
年輕人必開的信用卡之一，買衫優惠最多，而且一開卡就先送CashCoupon，即變相減價。不過缺點就是優惠集中在潮流服飾方面，其他優惠較少。
東亞卡食飯多着數
食肆優惠最豐富，喺365間餐廳食飯都有着數，日日食都要成年至用得完。
你哋夠唔夠精明？
Paco：「4月開卡，迎新禮物最好。」
Flora：「我儲過積分換禮物，不過無一次成功。」
Lora：「我有8張卡，都係幫朋友開，同埋貪迎新禮物。」
Karen：「試過開卡為咗部PSP，$1,000放咗喇，有賺。」
Pony：「我有4張卡，每張都有唔同優惠，食嘢一定用東亞卡，着數最多。我試過儲分換按摩器，不過，始終都係換Coupon實際啲。」
Mat：「我唔儲分，最緊要有即時回報。」
鵬：「前排幫朋友簽卡，即時有CashDollar，慳咗餐飯錢。」
