李澤楷隻8號仔出完年報後，噚日輪到佢老竇超人嘅長和系。超人嘅主席報告唔似以前咁有指導性思想，只有佢同埋小超人嘅嘜頭相，冇乜睇頭，華華惟有繼續睇睇打首富工嘅人pay得有幾好！
視富貴如浮雲嘅李超人，一如以往，繼續象徵式咁收5000蚊人工；要養四件金叵羅同埋老婆嘅小超人李澤鉅，一年人工4217萬，加咗6.9%，絕對高過市場平均數，應該拎出嚟畀社會各界做參考指標！
雖然小超人嘅人工唔及太子榮智健，但以超人呢啲咁正路嘅傳統潮州佬，斷估唔會好似佢個friend小甜甜咁，onelifemanywill，個江山咪又係留畀長子嫡孫──即係小超人同埋佢嘅仔米高，二少又好似冇興趣同佢爭，除非到時彈件神秘人出嚟！
至於做到兩鬚斑白嘅和黃大班霍建寧，如無意外仍然保持打工皇帝寶座，大班全年人工雖然減咗兩萬，但仍有1.31億。咁！點解少咗兩萬呢？基本上應該係啲四捨五入小數位之類嘅小問題！唔恨得咁多，大班份糧，好話唔好聽係咁意跌個小數點出嚟，分分鐘夠你食唔知幾多個月㗎！Bytheway，唔知超人會唔會送埋美原髮彩畀霍大班當花紅呢？
另外，經常成為女打工皇帝嘅和黃董事周胡慕芳，舊年冇人工加，維持喺3491萬，分分鐘仍然係全港人工最高嘅女人。
李華華
[email protected]