講開李超人，由末代港督彭定康做校監嘅牛記（即係英國牛津大學）噚日宣布，獲得超人基金揼水200萬英鎊（大約3138萬港銀），資助佢哋發展全球衞生計劃，同埋響亞洲地區（尤其係中國），建立全球衞生科研網絡，單睇銀碼，都算係超人近年出手較低之代表作之一，唔通因為肥彭過咗氣？
話好注重衞生
不過，肥彭響新聞稿話，超人嘅捐款為中國同牛記嘅關係，打開咗新嘅聯繫渠道，可以加強牛記同中國嘅策略夥伴關係。唔通超人諗住幫牛記去中國上市？
至於科水嘅超人就話，世界各地關係日益密切，社群命運與個人命運更係唇齒相依，在世界衞生層面上，呢個情況尤其明顯，因為疾病傳播嘅速度，比起衞生知識嘅傳播係有過之而無不及。超人咁注重衞生，唔知會唔會叫牛記研究提高百佳嘅食物安全呢又？
李華華
[email protected]