黃秋生近日除趕拍電影《老左正傳》外，更成為狗仔隊偷拍目標，經常被拍到跟模特兒Jessie出雙入對的照片。日前就因為有狗仔隊偷影他的家居生活，而令秋生大動肝火出手制止。雖然秋生遭遇值得同情，不過昨日他見記者時以「我都想知道周潤發同佢太太嘅性生活」作比喻，以乎有過火之嫌。
黃秋生、鄭中基，毛舜筠（毛毛）及莫文蔚，昨日在長沙灣一幢唐樓搭建的天台屋拍攝電影《老左正傳》，片中黃秋生飾演一名於香港土生土長，卻激進親共的左派分子。
「想影我冇着底褲」
秋生對於日前被狗仔隊在晚上偷拍家居生活，仍然非常激氣，更手持報章狂鬧：「半夜三更影我屋企，係唔係想影我冇着底褲？咁同新聞無關，純粹個人興趣，我都想知道周潤發同太太嘅性生活，我好想知但唔應該去偷影人哋。呢啲唔單止私隱，直情係監視同滋擾，極權國家都唔會明目張膽去做啦！變咗我喺私人空間都唔可以做啲私人嘢。」
於戲中飾演秋生太太的毛毛卻不忘取笑他說：「老公我梗信你啦，你唔係咁嘅人……就假嘞。」不過對於狗仔隊的滋擾，毛毛亦感同身受說：「呢個問題（狗仔隊偷影）就係我哋成日講囉，所以𠵱家喺屋企都要成日拉晒簾，就係驚人影到。」
失意影后當輸麻雀
另外，毛毛被問到失意金像影后可有失望？毛毛就以打牌來作比喻：「落場就唔想輸，輸咗當然有少少失望，不過事後諗番就冇事，最緊要好似打牌咁成日有得打就得啦。」
戲中飾演毛毛及秋生兒子的鄭中基，昨日以一個假髮造型出現，他表示雖然知道有關秋生的新聞，但就沒有追問，他說：「如果發生喺自己身上都唔想人問啦。」對於有指他在馬來西亞演唱時公開蔡卓妍女朋友身份，他卻辯稱只是搞搞氣氛而已。
採訪：何永寧
攝影：陳志嵐
