去得耀華街，除咗買衫買裙，當然唔少得要買accessories，左襯襯右襯襯，執番好成個look先出去見人。呢度除咗有不少時裝店進駐，仲有飾物、鞋店、名牌手袋店、懷舊飾物等正舖，反正都係shopping啦，唔爭在，一於掃晒佢！
05 做個獨一無二女鞋子
觀音頭就最忌掃把腳，除咗靚衫同化妝品、護膚品外，女人買得最多，一定係鞋。不過要買一對獨一無二又舒服嘅鞋，就真係難過登天，唔係怕同人撞款，就係對鞋着得唔舒服。位於耀華街嘅Shoegirl，專門幫人做鞋，由畫腳做模至揀用料款式，只要你講得出，佢都可以幫你做得出，無論係平底妹妹鞋、高貴高踭鞋，定係簡約真皮鞋，都有得度身訂做。喺耀華街開業短短3年，唔靠名牌貴brand，就已經吸引唔少OLFans，今年仲喺尖沙嘴開分店。除做鞋外，仲有其他皮革accessories例如銀包、手袋等都可以自訂款式同物料，搵佢哋幫手，包保唔會有唔啱心水嘅情況，今季佢哋仲新做咗唔少來年最流行嘅織皮款式，大家不妨睇睇！
Shoegirl（28341023）
地址：耀華街21號地下
06 平平哋趁吓懷舊墟
潮流興懷舊，Vintage風吹到呼呼聲，無理由唔跟咁out。想平平哋玩吓懷舊style，耀華街樓上舖Oldies諗得過。舖頭主打五、六十年代英美式懷舊style，除咗大量二手古着之外，仲有好多懷舊accessories，好似眼鏡、手帶、手袋等。雖然貨款有啲舊舊哋殘殘哋，但可能會搵到寶。飾物都係幾十蚊有找，如果唔鍾意着二手古着，或者可以襯幾件呢啲小飾物玩吓，當趁吓懷舊墟囉，抵啦！
Oldies（25758775）
地址：耀華街28號1樓
07 買名牌袋唔使等5年
要買各大名牌手袋，唔使我多提，各位姊妹除咗去專門店買，應該都識得去乜乜站物物站搜括自己心水貨，不過原來耀華街都有一間專賣名牌手袋及accessories嘅水貨店──名媛坊靜靜冒起名堂。呢度嘅貨款無其他手袋水貨店咁齊全，但勝在比出面平3至4成。店主平均每月都會親自飛去歐洲各國入貨兩次，店員表示，Hermes係佢哋嘅主打貨色，因為某些款式如果要在香港專門店購買，分分鐘要在waitinglist等上5至8年，真係可能有錢都買唔到㗎。
名媛坊（34283243）
地址：耀華街21號7號舖地下
08 天然材料自家製飾物
好多首飾店來來去去都係一般款式，悶悶哋，不如反璞歸真，搵番啲簡約又自然唔造作嘅首飾。gaz喺耀華街開咗8個月，算係新晉之一，但已經企得住腳，好多lady去完買衫，都去睇睇有咩靚首飾。呢度嘅首飾全部都由店主自家手製，大部份係用半寶石、玻璃、水晶、純銀等製造，甚至係用多種材料去mix&match，做出原始style，由於材料夠天然特別易襯衫，型襯又得，Highclass襯一樣得，款式一件起兩件止，夠晒unique。
gaz（28930082）
地址：耀華街15-21號地下
