影帝級人馬黃秋生早前接拍由姜文自導自演新片《太陽照常升起》，合作愉快，日前秋生接受內地嘅《南方都市報》訪問時，都忍唔住大讚姜文好人，唔單止演技好，做導演一樣出色。但講到後輩兼影后級人馬張栢芝，秋生就一啲都唔畀面，形容佢係「木頭」，仲話佢唔係好戲嘅演員㖭！
自誇人民藝術家
秋生用普通話講：「如果她（張栢芝）真的是一個很好的演員，演一部兩部三部不同導演的戲，都可以演到同一個水平，可她只有幾部，碰到好導演就好，碰不到就不好。她只是一個素材，一個木頭。導演是雕塑家，把木頭這樣放、那樣放，你覺得很好看，但你覺得木頭很聰明嗎？」
有內地影迷評價秋生，話佢係「配角鑄起的戲精、爛片出來的影帝」，秋生似乎幾鍾意呢句話，猛話：「精采！我喜歡！這就叫人民藝術家。」
執導筒唱衰女人
秋生一向都係好有性格，脾氣火爆，佢話以前試過同一啲導演合作發生磨擦，仲試過打起上嚟㖭。做咗演員咁多年，秋生終於都做導演，男主角定咗係鄭中基，套戲係講一個男人同十個女朋友嘅故事。秋生聲明拍呢部戲係要報女人嘅仇，馮仁昭真係唔明呢個緋聞多多嘅影帝，究竟同女人有乜深仇大恨呢？
