啱啱完成悉尼演唱會嘅韓國天王Rain馬不停蹄，噚日又飛咗去東京，仲喺下晝舉行記者會宣布下月25號喺東京巨蛋個唱嘅細節，Rain成為首位喺日本巨蛋開騷嘅韓國歌手，但佢原定下星期六（28號）舉行嘅上海演唱會，卻因為到噚日都未收到批文，睇怕都凶多吉少囉！
講開Rain嘅悉尼個唱，阿Net就喺佢嘅韓國官方fans網度見到幾張靚相，原來佢趁開騷前去咗海灘曬太陽，仲赤膊上陣勁晒胸肌，睇到女fans流晒口水。
狂搜尋賀5周年
Rain去咗澳洲著名嘅邦廸海灘，雖然佢曬到上身紅卜卜，但阿Net唔明點解佢仲戴住頂針織帽，唔通佢忽冷忽熱？忠心嘅香港歌迷即時喺本地fans網「笑雨型營」度，將偶像嘅沙灘相改製成雜誌封面，寫上「SexyMen」等字句，真係有諗頭。
另外，下星期二（24號）係Rain出道5周年嘅大日子，「笑雨型營」嘅會員打算效法組合神話嘅fans咁，發起雅虎搜尋紀念行動，以「Rain出道5周年」作為關鍵字喺網上狂search，務求令偶像登上香港雅虎搜尋榜冠軍咁話。
韓國fans官網網址： http://joyplace.jype.com/rain
笑雨型營網址： http://www.rainhk.com/bbs
版主：阿Net
本欄逢周一至六刊出