商台噚日播出羅嘉良（圖）嘅錄音訪問，對於老友劉青雲榮升金像影帝，嘉良話：「佢嘅演技應該幾年前就拎獎，𠵱家恭喜佢！」近年嘉良主力喺內地拍劇搵真銀，好多香港觀眾都話掛住佢，嘉良話佢都好希望可以再拍港劇，佢話：「我都想嘗試做唔同角色，睇番之前我拍嘅《流金歲月》、《創世紀》，覺得𠵱家拍會仲好。」