學生Ｙ為咗準備考大學，忙個不休，雖然讀緊中六啫，已要溫習不停，左丁山叫佢去報考TOFEL與IELTS，考第一次就唔需要準備，試吓自己實力先，如果成績不如理想，就知道唔掂嘞，要刨吓考試材料，讀多啲英文雜誌，以免明年考高考唔掂。學生Ｙ唯唯諾諾，話自己會上網搵資料，上網報考。
好彩學生Ｙ係香港學生啫。呢日睇《南華早報》，先知道大陸學生考IELTS要交「黃牛費」，由一百元人民幣至三百元人民幣不等，《南早》一位記者知道有此情形後，扮內地學生，登上一個bbs.gter.net報名，即刻收到幾個「黃牛」出價，由八十元人民幣至一百五十元，保證扮學生嘅記者可以喺五月在廣州有位考IELTS。
IELTS一年喺中國考幾次，因中國出外留學生太多，留歐者要考呢個試嚟證明自己嘅英文程度，所以每次考試都人數爆棚。各地省市「黃牛」就一早上網，用唔同身份與密碼霸晒位，然後在網上兜售。詳情可睇四月十四日《南華早報》教育版。
中國勝在人多，弊在人多，考IELTS都可以製造搵錢機會畀一啲有心人，無怪中國有咁多富翁。溫總理講過，中國有十三億人，將一件小事乘大十三億，就大到無倫，除以十三億，就小到微不足道，前政協主席李瑞環出版新書《辯證法隨談》，有句語錄話：「中國的小勺多，你別看小，鍋再大也經不起撈」。當然啦，有十三億小勺喎，故此李瑞環又講：「民以食為天，飯字半邊是『食』字，半邊是『反』字，沒有食就會反。」真係精彩。還有「有那麼一小部份人，在領導面前是奴才，幹起工作來是庸才，一切活動為了升官發財。一旦掌權就搞獨裁」！成日講中國小農意識嘅陶傑一定鍾意下一句：「在我們的工作常常帶有農村的特點，戰爭的痕跡，運動的方式；在經濟建設中，愛大搞，好突擊，走極端，多偏激。由於這個問題，我們吃的苦頭相當多了。」