早排聽日日周圍飛嘅悠樂祥講，原來日本正在打算引入一款採用柴油同電池嘅混能火車。我心諗，火車都有混能？乜火車本身唔係已經行電嘅咩？混多樣柴油咪更加污染環境！
不過阿祥同我解釋番，平時喺香港搭開嘅火車、地鐵同輕鐵等都已經全部電氣化，行柴油嘅火車都已經成為歷史，所以香港人都覺得火車用電係好理所當然嘅事。但原來喺其他地方，即使先進如日本，仍有唔少路線嘅火車仲採用緊柴油㗎，所以引進呢款混能火車其實亦係造福環境嘅一大突破。
原來係咁！聽阿祥講完之後，我對呢架混能火車就更加有興趣，於是上網搵搵料，知道呢架嘢係由日本嘅「JR東日本」所採用，開車嘅時候會用電，要加速行駛嘅時候就用柴油，到要停車落Brake嗰陣又會將能量轉為電能儲喺車頂嘅蓄電池。對比起一般嘅柴油火車，混能火車除咗可以慳10%燃料費外，排出嘅氮氧化物更減少60%㖭。
悠穎馳
豪邁不羈，愛車如命，聽幾下引擎聲就知咩車！