華懋集團悼龔如心文內提及龔如心自○四年發病，哈佛及世界名醫診治無效。我哋在茶樓飲茶為此講咗一輪，推斷係反駁何鴻燊之詞，燊哥越老越可愛，記者見到佢就嗒糖，因為佢老人家是但噏一句，都可以成為新聞，一定唔會令記者失望。別人患病入院，盡量唔會宣揚，燊哥生粒瘡，都開記者招待會，明益傳媒，講完自己仲順便講小甜甜有病唔醫！華懋現講明小甜甜去哈佛睇病，相信係講畀燊哥聽嘅。
大人物患癌症或心臟病，幾鍾意去哈佛、史丹福，唔通香港大學、中文大學兩間醫學院唔夠先進？去美國，都係有幸有不幸嘅啫，好似龔如心患癌，哈佛搞唔掂；查公子懋聲患癌，去史丹福就醫，回港吃靈芝，到現在都唔知幾精神，仲有精力去收購財務十分煩嘅亞洲電視㖭。美國東哈佛西史丹福，任你揀邊瓣。龔如心捐好多錢畀哈佛訓練中國解放軍，故此去哈佛就醫，查家捐好多錢畀史丹福，三兄弟都係史丹福MBA，故此查公子去史丹福就診。
去港大或中大睇病得唔得？得之至，搵教授睇私家症就可以，港大醫學院院長林兆鑫辭職，大家睇報紙知道乜嘢事。其實睇私家症唔錯㗎，好似係八百元一次，由教授級人馬睇症，算抵喇啩。前年有一位朋友患上鼻咽癌，在加拿大發現，於是立即在加拿大做手術，一年後就魂歸天國，可惜到極，因為呢位朋友豪爽慷慨，捐款做善事誓不後人，極受歡迎也。一位大教授識得佢，深感痛惜，教授話：「唔係講笑，醫鼻咽癌，香港第一，領先加拿大。呢位朋友如果喺香港做手術，應該冇事。」諗真啲，一位賓架患上鼻咽癌，在香港就醫，幾年來精神爽利。雖然話月是西方圓，洋和尚會打傘，香港醫學界其實亦有高手，名人未必有事就要去美國醫嘅。左丁山一位老友記嘅辦公室，就在史丹福大學外面一條街，佢有時返嚟香港都飲吓涼茶㗎。