當年小記第一次買部幾皮嘢嘅二手車，已當佢如珠如寶，每星期抹車又打蠟，落雨驚有水迹、泊街又驚中正雀屎！勢估唔到今時今日，小記居然可以攞部七十幾萬嘅AudiQ7嚟剷泥，嗰吓感覺興奮但唔折墮，皆因Q7個樣同設備都勁豪華，但骨子裏係越野SUV，預咗你挑戰惡劣環境，唔蹂躪佢即係唔畀面啫！
記者：周達之
攝影：黃子偉
模特兒：Heidi（TheGroup）
動力分布技術用番落SUV
早兩日落九龍灣Audi度攞部Q7嚟試，接待員姐姐好Nice咁幫我㩒𨋢，仲扯起話題：「哇，你真叻仔！咁後生就揸Audi！」唉，真慚愧，小記一向窮到燶，平時都係喺Canteen食$14.5兩餸飯！但做記者就有呢樣好，無錢都可以揸Audi，仲可以盡情攞佢嚟蹂躪！
大大個鬼面罩，粗豪而流線嘅外形，完全唔覺佢鈍。Audi嘅Quattro四驅技術一直係佢招牌作，識得自己計算力度再分配、將扭力分畀前後轆，四條胎嘅抓地力盡情發揮，就算喺沙地不停打圈同急煞，都冇話失控，所以你話唔整番部SUV就似乎對唔住自己兼車迷！
其實Q7之前已經有3.0TDI柴油同4.2FSI汽油直接噴射引擎版，今次小記試呢部係3.6版，亦係汽油直接噴射，馬力有成280匹，所以就算成兩噸幾重，但0-100km/h嘅加速亦只係8.5秒。
Off-road跑得起
唔係話一味淨係識得讚，不過Q7賣得貴，用嘅料亦真係唔差，試揸公路一段的確唔覺佢有成兩噸幾重，踩油即去踩Brake即停，軚盤喺慢速時感覺輕盈，而快速時又有番實在感，整體同揸部大型房車差唔多，而對比起一般SUV佢的確高幾班。
走到沙地同泥地拍攝時，初時仲驚片彎嗰陣會跣出去對攝影師構成危險，不過就算信唔過我都應該信吓ESPOff-road系統，佢令Q7有足夠嘅抓地力，即使喺又亁又濕嘅沙泥地交替奔走，依然穩定。拍攝當日攝影師都只係食晒泥咁大把，絕不危險！心諗有時SUV唔係一味講甚麼空間靈活多用途，操控性佳亦的確幾令人興奮，起碼今次車版嘅一班俊男都玩得好開心。只可惜3.6版唔似4.2版有埋AdaptiveAirSuspension，無得將懸掛升高降低應付不同路面，令試車時玩少好多嘢。
乜都電動懶人最啱
架車豪華結果令小記喺模特兒小姐面前出洋相，關車尾門時正想用力拉之際，Audi嘅職員哥哥隨即喝住小記，原來尾門係電動油壓開關，用力拉嘅話反而會整壞道門，真𤓓。頭頂兩片電動大天窗，開揚之餘亦唔覺影響部車嘅剛陽性。Bose音響有埋噪音自動補償功能，識得自動調整音響音量，連扭大細聲嘅力都慳番，Q7簡直係懶人至愛。
車版SunBoy'z部部進逼
阿龍：福士、Benz、波子通通都有旗艦級嘅大牛龜越野四驅車，今勻連Audi都不甘寂寞，而且成品令我驚喜，起碼車身勁高，揸出街攝位、爬頭話咁易，3,600c.c.V6偈都唔講得笑，揸起上嚟不期然向着前車「部部進逼」！
丹尼斯：我覺得Q7線條好靚，睇落大大部好有肌肉感，完全係我心目中SUV嘅標準Style；3.6公升引擎表現強勁，令到起步加速嗰陣好爽快。可惜車廂空間差少少，身形龐大如我坐上去，頭頂空間唔係太夠。
之達：俾接待員姐姐講完句「咁後生就揸Audi」後，的確好慚愧，所以決定今日起要努力搵錢，望他朝有日揸得起Audi。不過到時希望姐姐唔好同我講：「哇！乜你臨老先嚟揸Audi？」
AudiQ7規格
引擎：3,597c.c.V型6汽缸、汽油直接噴射
馬力：280hp/6,200rpm
扭力：360Nm/2,500-5,000rpm
傳動：四驅6前速手自動Tiptronic
尺碼：5,086×2,177×1,737mm
車重：2,250kg
售價：$744,000
車輛提供：合廸汽車（25281862）
跟波子Cayenne
八成似
同樣貴氣、同樣V6、同樣採燃油噴注，但馬力就比Q7多10匹，Cayenne原裝用6前速手波，買家可轉6前速TiptronicS半自動波，咁就同Q7更似。
售價：$798,000
查詢：保時捷中心（29262911）
